மூன்று கிலோ போதை பவுடர், போலி நகைகள் பறிமுதல்: இருவர் கைது

சென்னை விமான நிலையத்தில் இருந்து வெளிநாடுகளுக்கு அனுப்பப்படும் பார்சல்களில் போதைப்பொருள்கள் கடத்தப்படுவதாக சென்னையில் உள்ள மத்திய போதைப் பொருள் தடுப்புப் பிரிவு அதிகாரிகளுக்கு ரகசிய தகவல் கிடைத்தது. தகவலின் அடிப்படையில் மத்திய போதை தடுப்புப் பிரிவு அதிகாரிகள் சென்னை விமான நிலைய சரக்க பகுதியில் வெளிநாடுகளுக்கு அனுப்பப்படும் பார்சல்களை தீவிர சோதனை செய்தனர்.

அப்போது சென்னை விமான நிலையத்தில் இருந்து ஆஸ்திரேலியாவுக்கு அனுப்பப்படும் பார்சல்களை சோதனை செய்தபோது 3 கிலோ எபிட்ரின் போதை பவுடர், 56 பெட்டிகளில் கவரிங் நகைகள், ஆகியவை பறிமுதல் செய்தனர். இதையடுத்து ஆஸ்திரேலியாவுக்கு அனுப்ப இருந்த பார்சல்களில் இருந்த முகவரியை வைத்து இரண்டு பேரை மத்திய போதைப்பொருள் தடுப்பு பிரிவு அதிகாரிகள் கைது செய்துள்ளனர். இதுதொடர்பாக கைது செய்யப்பட்ட இரண்டு நபர்களிடம் மத்திய போதை தடுப்பு பிரிவு அதிகாரிகள் தீவிரமாக விசாரணை மேற்கொண்டு வருகின்றனர்.