மதிப்பெண் மட்டுமே தகுதி அல்ல..! பெற்றோரே கவனியுங்கள்..!

இன்று ஒரு முக்கியமான நாள். தமிழ்நாடு முழுவதும் உள்ள லட்சக்கணக்கான பிளஸ் 2 மாணவர்களின் இதயங்கள் படபடப்புடன் காத்திருந்த தருணம் வந்துவிட்டது. ஆம், பிளஸ் 2 தேர்வு முடிவுகள் வெளியாகிவிட்டன.

தேர்வு முடிகள் வெளியான இந்த தருணத்தில், மகிழ்ச்சி, நிம்மதி, ஏமாற்றம், குழப்பம் என கலவையான உணர்வுகளால் ஆட்கொள்ளப்பட்டிருப்பீர்கள். முதலில், எந்த உணர்வு மேலோங்கினாலும், உங்கள் உழைப்புக்கான அங்கீகாரமாக முடிவுகளைப் பாருங்கள். உங்கள் முயற்சிக்கான பலனை அறுவடை செய்திருக்கிறீர்கள் என்று மனதில் நிம்மதி பெறுங்கள்.

வெற்றிகரமான மாணவர்களின் அடையாளங்கள்

சமநிலை: மிகுந்த மகிழ்ச்சியிலும் சரி, எதிர்பார்த்த மதிப்பெண்கள் கிடைக்காத போதிலும் சரி, தங்களை நிலைநிறுத்திக் கொள்பவர்களே சிறந்த மாணவர்கள். வெற்றி தலைக்கணத்தை ஏற்படுத்தாது. தோல்வியும் நம்மை முற்றிலுமாக அமிழ்த்திவிடாது.

தன்னம்பிக்கை: தேர்வு முடிவுகள் எப்படி இருந்தாலும், 'என்னால் முடியும்' என்ற தன்னம்பிக்கையை ஒருபோதும் கைவிடக்கூடாது. நமது கனவுகளையும், லட்சியங்களையும் அடைய தேவையான முனைப்புடன் தொடர்ந்து செயல்பட வேண்டும்.

ஆலோசனையும் திட்டமிடலும்: பெற்றோர், ஆசிரியர்கள் மற்றும் நலன்விரும்பிகளின் அறிவுரைகளை காது கொடுத்து கேளுங்கள். அனுபவம் மிக்கவர்களின் வார்த்தைகள் வழிகாட்டும். அவர்களின் உதவியுடன் கவனமாக திட்டமிட்டு அடுத்த கட்டத்தை நோக்கி பயணிக்க வேண்டும்.

உங்கள் பாதையை நீங்களே தேர்ந்தெடுங்கள்

உங்கள் முடிவுகளை கண்டு மனம் தளர வேண்டாம். உயர்கல்விக்கு இன்னும் ஏராளமான வாய்ப்புகள் உள்ளன.

விருப்பமான படிப்பைத் தொடருங்கள்: எந்தப் படிப்பில் உங்களுக்கு உண்மையான ஆர்வம் உள்ளதோ அதனை நோக்கிச் செல்லுங்கள். வெறும் சமூக அழுத்தத்திற்காகவோ அல்லது நண்பர்கள் தேர்ந்தெடுக்கும் படிப்பை பார்த்தோ முடிவெடுக்காதீர்கள்.

மதிப்பெண்கள் மட்டுமே தகுதியை நிர்ணயிப்பதில்லை: மதிப்பெண்களைத் தாண்டிய திறமைகளை வளர்த்துக் கொள்வதும் முக்கியம். தலைமைப் பண்பு, தொடர்புத் திறன், படைப்பாற்றல் போன்றவை உங்கள் எதிர்கால முன்னேற்றத்திற்கு மிகவும் அவசியம்.

மற்ற வாய்ப்புகளையும் ஆராயுங்கள்: உங்களுக்கு பொருத்தமான படிப்பு கிடைக்கவில்லை என்றால், ஓராண்டு இடைவெளி எடுத்துக் கொண்டு போட்டித் தேர்வுகளுக்கு தயாராகலாம் அல்லது வேறு பயனுள்ள செயல்களில் ஈடுபடலாம். திறன் மேம்பாட்டு பயிற்சிகளில் சேர்ந்து கொள்ளுங்கள். வாழ்க்கைக்கான அடித்தளத்தை பலப்படுத்துங்கள்.

தோல்விக்கு பயப்படாதீர்கள்

வாழ்க்கை என்பது தொடர்ச்சியான பயணம். இதில் வெற்றி, தோல்விகள் இரண்டுமே கலந்திருக்கும். தோல்விகண்டு துவண்டு விடாமல், அவற்றை படிக்கற்களாக மாற்றிவிடுங்கள். அடுத்த முயற்சியில் சிறப்பான பலனை பெற அதுவே உதவும்.

முயற்சியே வெற்றிக்கு அடிப்படை: திறமை இருந்தும் முயற்சி இல்லையென்றால் பயனில்லை. சளைக்காமல் கடினமாக உழைப்பவர்களுக்கு நல்ல எதிர்காலம் காத்திருக்கிறது. எல்லாத் தடைகளையும் தாண்டி வெற்றி பெற, விடாமுயற்சி தேவை.

மாற்று வழிகளைத் தேடுங்கள்: கதவுகள் சாத்தப்படுகின்றன என்று நினைக்காதீர்கள். இன்னும் பல வழிகள் திறந்தே இருக்கின்றன. சரியான திட்டமிடலும் ஆலோசனையும் இருந்தால், மாற்று பாதைகளைக் கண்டறியலாம்.

நேர்மறையான அணுகுமுறை வேண்டும்: சவால்களை தைரியமாக எதிர்கொள்ளுங்கள். 'இதையும் கடந்துவிடுவேன்' என்ற நேர்மறையான அணுகுமுறை உங்களை வழிநடத்தும்.

அன்பான பெற்றோர்களுக்கும் ஒரு வார்த்தை

உங்கள் குழந்தைகளின் மதிப்பெண்களை வைத்து அவர்களை தயவுசெய்து மதிப்பிடாதீர்கள். தேர்வு முடிவுகள் என்பது அவர்களது வாழ்க்கையின் ஒரு அம்சம் மட்டுமே. அவர்களின் திறமைகளை பாராட்டுங்கள். தோல்வியை அனுபவித்திருந்தால் சோர்ந்து விடாமல் இருக்க ஆதரவளியுங்கள்.

உங்கள் ஆதரவும் உங்களின் நம்பிக்கையான பேச்சு மட்டுமே மீண்டும் அவர்கள் எழுச்சி பெறுவதற்கு உதவும் என்பதை மனதில்கொள்ளுங்கள். நம்பிக்கை கொடுங்கள், தட்டிக்கொடுங்கள். தைரியமூட்டுங்கள். அவர்கள் தவறான முடிவுகள் எடுக்காமல் இருக்க உங்கள் வார்த்தைகளே பிரதானம்.

அன்பு மாணவர்களே, பிளஸ் 2 முடிவுகள் ஒரு முற்றுப்புள்ளி அல்ல. புதிய அத்தியாயத்தின் தொடக்கமாக இதை கருதுங்கள். உங்கள் கனவுகளை அடைய உறுதியுடன் அடியெடுத்து வையுங்கள்.

உங்கள் எதிர்காலம் வளமானதாக அமைய வாழ்த்துகள்!