உலகின் மிக உயரமான வானிலை நிலையம் : எவரெஸ்ட் சிகரத்தில் அமைப்பு

(World Highest Weather Station)தேசிய புவியியல் அமைப்பின்  நிபுணர்கள் குழு, பல்வேறு வானிலை நிகழ்வுகளை தானாக அளவிடும் வகையில் 8,830 மீட்டர் உயரம் உள்ள எவரெஸ்ட் சிகரத்தில் வானிலை நிலையத்தை அமைத்துள்ளனர். அந்த வானிலை நிலையம்  உலகின் மிக உயர்ந்த வானிலை நிலையமாகும். இது குறித்து  நேபாள ஊடகங்கள் கடந்த வாரம் செய்திகள் வெளியிட்டுள்ளன.

நேபாளத்தின் நீரியல் மற்றும் வானிலை ஆய்வுத் துறை (Department of Hydrology and Meteorology) நடத்திய  மாநாட்டில் எடுக்கப்பட்ட தீர்மானங்களின் அடிப்படையில் இமய மலையின் மிக உயரமான இடத்தில் வானிலை நிலையம் அமைக்க திட்டமிடப்பட்டது. ஆனால், இமய மலையில் உள்ள உறைபனியால்  உபகரணங்களை சரிசெய்வதற்கு ஏற்றதாக இல்லை. அதனால் திட்டமிடப்பட்ட உயரத்தைக் காட்டிலும்  (8,848.86 மீட்டர்) சில மீட்டர் கீழே தானியங்கி வானிலை நிலையம் நிறுவப்பட்டது.

சூரிய சக்தியால் இயங்கும் வகையில் உருவாக்கப்பட்டுள்ள இந்த வானிலை கண்காணிப்பு அமைப்பு, காற்றின் வெப்பநிலை, காற்றின் வேகம் மற்றும் திசை, காற்றழுத்தம், பனியின் மேற்பரப்பு உயரத்தில் ஏற்படும் மாற்றம் மற்றும் உள்வரும்,வெளிச்செல்லும் குறுகிய மற்றும் நீண்ட அலை கதிர்வீச்சு போன்ற பல்வேறு வானிலை நிகழ்வுகளை அளவிடும் வகையில் அமைக்கப்பட்டுள்ளது.

அமெரிக்காவின் அப்பலாச்சியன் ஸ்டேட் யுனிவர்சிட்டியைச் சேர்ந்த காலநிலை விஞ்ஞானி பேக்கர் பெர்ரி தலைமையிலான நாட்ஜியோ குழுவில் (NatGeo) புகழ்பெற்ற மலை ஏறுபவர்கள் மற்றும் விஞ்ஞானிகள் இடம் பெற்றிருந்தனர். அவர்களில் பலர் வானிலை நிலையத்தை நிறுவும் போது உலகின் மிக உயரமான சிகரத்தை அளந்தனர்.

அந்த குழு நேபாளத்தின் எவரெஸ்ட் பகுதியில் ஒரு மாதம் கழித்ததோடு, சவுத் கொல்லில் உள்ள ஒரு வானிலை நிலையம் உட்பட மற்ற நிலையங்களின் பராமரிப்பையும் மேற்கொண்டதாக தி ஹிமாலயன் டைம்ஸ் செய்தி வெளியிட்டுள்ளது.

DHM மற்றும் நேஷனல் ஜியோகிராஃபிக் ஆகியவை மலை நிலைமைகள் தொடர்பான நிகழ்நேர தகவல்களை வழங்குவதற்காக NatGeo ஆல் நிறுவப்பட்ட ஐந்து தானியங்கி வானிலை நிலையங்களையும் இயக்குவதற்கான புரிந்துணர்வு ஒப்பந்தத்தில் கையெழுத்திட்டன.

புரிந்துணர்வு ஒப்பந்தத்தின் கீழ், தேசிய புவியியல் குழு 2026 ஆம் ஆண்டில் தொழில்நுட்பத்தை நேபாள அரசாங்கத்திற்கு மாற்றுவதற்கு முன்பு 2025ம் ஆண்டு வரை நிலையங்களை தேசிய புவியியல் குழுவே முழுமையாக இயக்கும் என்று அறிக்கை கூறுகிறது.

DHM அதிகாரிகளின் கூற்றுப்படி, பணியை முடித்த பின்னர் குழு காத்மாண்டு திரும்பியது. DHM இன் டைரக்டர் ஜெனரல் கமல் ராம் ஜோஷி கூறுகையில், DHM, NatGeo சேவையகங்கள் வழியாக தரவை அனுப்பாமல் நேரடியாக நேபாள அதிகாரிகளுக்கு அனுப்புமாறு NatGeo குழுவிடம் கோரிக்கை விடுத்துள்ளோம் என்றார்.

இதே போல ஒரு சீன குழு எவரெஸ்டின் வடக்குப் பகுதியில் 8,800 மீட்டர் உயரத்தில் தானியங்கி வானிலை கண்காணிப்பு அமைப்பை நிறுவியுள்ளது குறிப்பிடத்தக்கது. சீன ஊடக அறிக்கைகளின்படி, பெய்ஜிங்கில் 5,200 மீட்டர் முதல் 8,800 மீட்டர் வரை எவரெஸ்ட் மலையில் 8 நிலையங்கள் அமைக்கப்பட்டுள்ளன. நான்கு நிலையங்கள் 7,028 மீட்டர்கள், 7,790 மீட்டர்கள், 8,300 மீட்டர்கள் மற்றும் 8,800 மீட்டர்கள் என 7,000 மீட்டருக்கு மேல் அமைக்கப்பட்டுள்ளன என்று கூறப்பட்டுள்ளது.