கேரளாவிற்கு மஞ்சள் எச்சரிக்கை, தெலுங்கானா மற்றும் ஆந்திராவில் வெப்ப அலை

கேரளாவில் பருவமழை தொடங்கிய சில நாட்களுக்குப் பிறகு, இந்திய வானிலை ஆய்வு மையம் (ஐஎம்டி) ஞாயிற்றுக்கிழமை கேரளா மற்றும் கடலோர கர்நாடகாவில் உள்ள 6 மாவட்டங்களுக்கு மஞ்சள் எச்சரிக்கை விடுத்துள்ளது , இரண்டு மாநிலங்களில் கனமழை பெய்யும் என்று எதிர்பார்க்கப்படுகிறது.

கேரளாவில் அலப்புழா, இடுக்கி, எர்ணாகுளம், திருச்சூர், வயநாடு மற்றும் கோழிக்கோடு ஆகிய 6 மாவட்டங்களில் எச்சரிக்கை விடப்பட்டுள்ளது. ஞாயிற்றுக்கிழமை ஆலப்புழா, எர்ணாகுளம், கோழிக்கோடு, மலப்புரம், திருச்சூர் மற்றும் இடுக்கியில் ஒருசில இடங்களில்  கனமழை பெய்யும் என்றும், கோழிக்கோடு மற்றும் கண்ணூர் மாவட்டங்களுக்கு திங்கள்கிழமை மஞ்சள் எச்சரிக்கை விடப்பட்டுள்ளது.

கடலோர கர்நாடகா, தட்சிண கன்னடா மற்றும் உத்தர கன்னடா மாவட்டங்களில் ஜூன் 10 முதல் ஜூன் 12 வரை ஒருசில  இடங்களில் கனமழை எதிர்பார்க்கப்படுவதால்,  மஞ்சள் எச்சரிக்கை விடுத்துள்ளது. பருவமழை ஜூன் 12 முதல் மாநிலத்தின் பிற பகுதிகளுக்கு முன்னேறும் என்று எதிர்பார்க்கப்படுகிறது.

தட்சிண கன்னடாவில் உள்ள மங்களூருவில் 5 செ.மீ மழையும், உத்தர கன்னடா மாவட்டத்தில் உள்ள ஷிராலி மற்றும் கோட்டாவில் 4 செ.மீ மழையும் பெய்ததால் கடலோர கர்நாடகா பகுதியில் நல்ல மழை பெய்துள்ளது. மேலும், ஜூன் 1 முதல் செப்டம்பர் 30 வரை பெங்களூரில் 60 செ.மீ மழை பெய்யும் என்று அதிகாரிகள் கணித்துள்ளனர்

தமிழகத்தில் கொளுத்தும் வெயில்

சென்னை உட்பட தமிழகத்தின் பல பகுதிகளில் ஜூன் மாதம் எட்டாவது நாளாக 40 டிகிரி செல்சியஸைத் தாண்டியுள்ளது பாதரசம். இந்த ஆண்டு தென்மேற்கு பருவமழை தாமதமாக வருவதே மாநிலத்தில் வெப்பம் அதிகமாக இருப்பதற்கு காரணம் என்று நிபுணர்கள் சுட்டிக்காட்டினர். சனிக்கிழமை சென்னை மீனம்பாக்கத்தில் 41.1 டிகிரி செல்சியஸ் வெப்பநிலையும், நுங்கம்பாக்கத்தில் 41 டிகிரி செல்சியஸ் வெப்பநிலையும் பதிவாகியுள்ளது.

மாநிலத்தின் பிற பகுதிகளில், திருத்தணியில் 41.1 டிகிரி செல்சியஸ் வெப்பம் பதிவாகியுள்ளது. மதுரை, நாகப்பட்டினம் மற்றும் கடலூர் மாவட்டங்களில் கூட சனிக்கிழமையன்று வெப்பநிலை  கிட்டத்தட்ட 40 டிகிரி வரை உயர்ந்துள்ளது. இருப்பினும் மாலையில் சாரல் மழை பெய்தது சென்னை மக்களுக்கு நிம்மதியை அளித்தது.

தெலுங்கானா, ஆந்திராவில் வெப்ப அலை

தெலுங்கு மாநிலங்களான ஆந்திரா, தெலுங்கானா ஆகிய இரு மாநிலங்களிலும் கடும் வெப்பம் நிலவி வருகிறது. ஆந்திரப் பிரதேசத்தில், மாநிலம் முழுவதும் பல பகுதிகளில் வெப்பநிலை 40 டிகிரி செல்சியஸாக உயர்ந்தது, அதே நேரத்தில் தெலுங்கானாவில் அதிகபட்ச வெப்பநிலை குமாரம் பீம் மற்றும் பெத்தபள்ளியில் 45.1 டிகிரி செல்சியஸ் ஆக இருந்தது. ஆனால், ஹைதராபாத்தில் உள்ள சரூர்நகர் 40.9 டிகிரி பதிவாகியுள்ளது.

தெலுங்கானாவில் பல மாவட்டங்களில் இடியுடன் கூடிய மின்னல் மற்றும் பலத்த காற்றுடன் கூடிய மழை பெய்யக்கூடும்.