அனுமதி இல்லா மின் திட்டத்தால் விவசாய நிலம் சேதம்

அனுமதி இல்லா மின் திட்டத்தால் விவசாய நிலம் சேதம்

நாமக்கல் மாவட்டம், குமாரபாளையம் தாலுகா எலந்தக்குட்டை கிராமத்தைச் சேர்ந்த மக்கள், தங்களது விவசாய நிலங்கள் ஆக்கிரமிக்கப்படுவதை கண்டித்து கலெக்டரிடம் முறையிட்டனர். காட்டுப்பாளையம் பகுதியில் ஒரு தனிநபர் மேற்கொண்டு வரும் சோலார் மின் உற்பத்தி திட்டத்திற்காக, அனுமதியின்றி அவர்கள் சொந்தமான விவசாய நிலத்தின் வழியாக உயர்மின் கம்பங்கள் அமைக்கப்பட்டு வருவதாக பொதுமக்கள் புகார் தெரிவித்துள்ளனர்.

இந்த நடவடிக்கையால் விவசாய நிலங்கள் நேரடியாக பாதிக்கப்படுவதோடு, பல தென்னை மரங்கள் அழிக்கப்பட்டுள்ளன என்றும், தங்களது நீர்வழிப் பாதைகள், ஓடைகள், குளங்கள் உள்ளிட்ட மூலவளங்களும் சேதமடைந்துள்ளதாகவும் அவர்கள் தெரிவித்துள்ளனர். இது விவசாயத்தை மட்டுமல்ல, சுற்றுச்சூழலையும் ஆபத்தான நிலைக்கு தள்ளும் என கூறி, அத்துமீறல் நடவடிக்கைகளை உடனடியாக நிறுத்தி, சட்டப்படி நடவடிக்கை எடுக்க வேண்டும் என அவர்கள் கலெக்டரிடம் கோரிக்கை மனுவை அளித்துள்ளனர்.

பொதுமக்களின் நில உரிமைகளும், வாழ்வாதாரமும் பாதிக்கப்படும் இந்த நிலைமையை நிர்வாகம் என்னவாக கையாளப்போகிறது என்பது எதிர்வரும் நாட்களில் விளங்கும்.