கொள்முதல் விலையை குறைப்பதால் கோழிப்பண்ணையாளர்களுக்கு நஷ்டம்

கொள்முதல் விலையை குறைப்பதால் கோழிப்பண்ணையாளர்களுக்கு நஷ்டம்

கொள்முதல் விலையை விட குறைத்து கோழி பிடிப்பதால், கோழிப்பண்ணையாளர்கள் பெரும் நஷ்டத்திற்கு தள்ளப்பட்டுள்ளனர்" என தமிழக முட்டைக்கோழி பண்ணையாளர்கள் சம்மேளன துணைத்தலைவர் வாங்கிலி சுப்ரமணியம் கவலை தெரிவித்துள்ளார். இந்த பிரச்சனை தமிழகத்தில் ஆயிரக்கணக்கான கோழிப்பண்ணையாளர்களை பெரும் பொருளாதார நெருக்கடிக்கு தள்ளியுள்ளது.

தமிழகத்தில் பல்லடம், நாமக்கல், ஈரோடு உள்ளிட்ட பகுதிகளில் 25,000 கறிக்கோழி உற்பத்தி பண்ணைகள் செயல்பட்டு வருகின்றன. இந்த பண்ணைகள் மூலம் தினமும் சுமார் 30 லட்சம் கிலோ கறிக்கோழி உற்பத்தி செய்யப்படுகிறது. பண்ணை கொள்முதல் விலையை பல்லடத்தில் உள்ள கறிக்கோழி ஒருங்கிணைப்புக்குழு (பி.சி.சி.) சார்பில் தினமும் நிர்ணயம் செய்யப்படுகிறது.

கடந்த மார்ச் 1 அன்று கொள்முதல் விலை கிலோவிற்கு 84 ரூபாயாக நிர்ணயிக்கப்பட்டது. அதன்பிறகு தொடர்ந்து விலை ஏற்ற இறக்கம் காணப்பட்டது. மார்ச் 31ல் 118 ரூபாய், ஏப்ரல் 3ல் 102 ரூபாய், ஏப்ரல் 5ல் 94 ரூபாய், ஏப்ரல் 6ல் 96 ரூபாய் என விலை நிர்ணயிக்கப்பட்டது. ஆனால் நேற்று மேலும் 7 ரூபாய் குறைந்து, கிலோ 89 ரூபாய்க்கு விற்பனை செய்யப்பட்டது.

வாங்கிலி சுப்ரமணியம் தெரிவித்ததாவது: "கொள்முதல் விலையில் இருந்து ஒரு கிலோவிற்கு 20 முதல் 25 ரூபாய் வரை குறைத்தே வியாபாரிகள் கோழிகளை பண்ணைகளில் இருந்து பிடிக்கின்றனர். இதனால் பண்ணையாளர்கள் பெரும் நஷ்டத்திற்கு உள்ளாகியுள்ளனர். கொள்முதல் விலைக்கே கோழிகளை பிடித்தால் மட்டுமே, பண்ணையாளர்களுக்கு கணிசமான லாபம் கிடைக்கும். வியாபாரிகள் இவ்வாறு விலை குறைப்பதை நிறுத்தி, நியாயமான விலை வழங்க வேண்டும்."

இந்த நிலையில், கறிக்கோழி பண்ணையாளர்கள் தங்கள் பிரச்சினைகளுக்கு தீர்வு காண அரசு தலையிட வேண்டும் என்றும், கோழி வியாபாரிகள் நிர்ணயிக்கப்பட்ட கொள்முதல் விலைக்கே கோழிகளை வாங்க வேண்டும் என்றும் கோரிக்கை விடுத்துள்ளனர்.