நாமக்கல் கால்நடை மருத்துவ கல்லுாரி சாம்பியன் பட்டம்
தடகள போட்டியில், நாமக்கல் கால்நடை மருத்துவ கல்லுாரி ஒட்டு மொத்த சாம்பியன் பட்டம் பெற்று சாதனை படைத்தது;
நாமக்கல் கால்நடை மருத்துவ கல்லுாரி சாம்பியன் பட்டம்
தமிழ்நாடு கால்நடை மருத்துவ அறிவியல் பல்கலை உறுப்பு கல்லுாரிகளுக்கான விளையாட்டு மற்றும் தடகள போட்டியில், நாமக்கல் கால்நடை மருத்துவ கல்லுாரி மற்றும் ஆராய்ச்சி நிலையம் ஒட்டுமொத்த சாம்பியன் பட்டத்தை பெற்றது. இந்த போட்டி தமிழ்நாடு கால்நடை மருத்துவ அறிவியல் பல்கலைக் கல்லுாரிகளுக்கான மாணவ, மாணவியருக்கான விளையாட்டுப் போட்டியாக நாமக்கல் கால்நடை மருத்துவ கல்லுாரி மற்றும் ஆராய்ச்சி நிலையத்தில் இரண்டு நாட்கள் நடைபெற்றது.
போட்டிகளில் ஆண்களுக்கான கூடைப்பந்து போட்டியில் சென்னை கால்நடை மருத்துவ கல்லுாரி அணி வெற்றிபெற்றது, பெண்களுக்கான கூடைப்பந்து போட்டியில் நாமக்கல் கால்நடை மருத்துவ கல்லுாரி மற்றும் ஆராய்ச்சி நிலைய அணி வெற்றி பெற்றது. அதேபோல், தடகள போட்டிகளில் ஆண்கள் மற்றும் பெண்களுக்கான தனி நபர் சாம்பியன் பட்டங்களை நெல்லை கால்நடை மருத்துவ கல்லுாரி மற்றும் ஆராய்ச்சி நிலைய மாணவர்கள் முகமது சாட் மற்றும் காவியா வென்றனர்.
இந்த விழாவின் நிறைவு கூட்டத்திற்கு நாமக்கல் கால்நடை மருத்துவ கல்லுாரி மற்றும் ஆராய்ச்சி நிலைய முதல்வர் செல்வராஜூ தலைமை வகித்தார், விளையாட்டு செயலாளர் வாசன் வரவேற்றார். விழாவில், ஈரோடு மாவட்டத்தின் பெருந்துறை கிரிஷி நியூட்ரிஷன் நிறுவன மேலாண் இயக்குனர் ராமமூர்த்தி மற்றும் கோவை அக்க்ஷயா கோழிப்பண்ணை ஆலோசனை நிறுவன தலைவர் ராஜேந்திரன் முன்னிலை வகித்தனர். தமிழ்நாடு கால்நடை மருத்துவ அறிவியல் பல்கலை பதிவாளர் மற்றும் துணை வேந்தர் நரேந்திரபாபு வெற்றி பெற்ற அணிகளுக்கு பாராட்டு சான்றிதழ் மற்றும் கோப்பைகளை வழங்கினார்.
இந்த நிகழ்ச்சியில் நாமக்கல் கால்நடை மருத்துவ கல்லுாரி மற்றும் ஆராய்ச்சி நிலையம் சாதனை படைத்து, ஒட்டுமொத்த சாம்பியன் பட்டம் பெற்றது.