திருநெல்வேலி மாவட்டம் மூலக்கரைப்பட்டி அருகே தனியார் பஸ் கவிழ்ந்து ஏற்பட்ட விபத்தில் 10 க்கும் மேற்பட்டோர் படுகாயமடைந்து திருநெல்வேலி அரசு மருத்துவகல்லூரி மருத்துவமனையில் அனுமதிக்கப்பட்டனர்.
தூத்துக்குடி மாவட்டம் சாத்தான்குளத்தில் இருந்து திருநெல்வேலி நோக்கி வந்து கொண்டிருந்த தனியார் பஸ், திருநெல்வேலி மாவட்டம் முனைஞ்சிப்பட்டி - மூலைக்கரைப்பட்டி இடையே வந்து கொண்டிருந்த போது கட்டுப்பாட்டை இழந்த நிலையில் சாலையில் இருந்த குறுகிய பாலத்தின் பக்கவாட்டு சுவரில் மோதி தலைகுப்புற கவிழ்ந்து விபத்து ஏற்பட்டது. விபத்தில் பஸ்சில் பயணித்த 30க்கும் மேற்பட்டோர் காயமடைந்தனர்.
இந்த சம்பவத்தை பார்த்த அக்கம்பக்கத்தினர் விபத்தில் சிக்கிய நபர்களை பத்திரமாக மீட்டு 108 ஆம்புலன்ஸ் உதவியுடன் மூலைக்கரைபட்டி மற்றும் பாளையங்கோட்டை அரசு மருத்துவக் கல்லூரி மருத்துவமனைக்கு அனுப்பி வைத்தனர். சிறு, சிறு காயங்கள் ஏற்பட்ட 15 க்கும் மேற்பட்ட நபர்கள் மூலக்கரைபட்டி மற்றும் பாளையங்கோட்டை அரசு மருத்துவமனையில் முதலுதவி சிகிச்சை பெற்று வீடு திரும்பினர். படுகாயமடைந்த 10 க்கும் மேற்பட்டோர் அரசு மருத்துவக் கல்லூரி மருத்துவமனையில் அனுமதிக்கப்பட்டு தீவிர சிகிச்சை அளிக்கப்பட்டு வருகிறது. சம்பவம் குறித்து மூலைக்கரைப்பட்டி போலீசார் வழக்கு பதிவு செய்து விசாரணை நடத்தி வருகின்றனர்.