தென்காசி கருப்பா நதி அணையில் இருந்து பிசான சாகுபடிக்கு தண்ணீர் திறப்பு

பிசான சாகுபடிக்கு கருப்பா நதி அணையில் இருந்து தண்ணீர் திறக்கப்பட்டது.

தென்காசி மாவட்டம் கருப்பாநதி அணையில் இருந்து பிசான சாகுபடிக்கு 136 நாட்களுக்கான தண்ணீரை மாவட்ட ஆட்சியர் துரை.ரவிச்சந்திரன் திறந்து வைத்தார். உபரி நீர் வெளியேற்றப்பட்ட நிலையில் கரையோர மக்களுக்கும் எச்சரிக்கை விடுக்கப்பட்டுள்ளது

தென்காசி மாவட்டம் கடையநல்லூர் அடுத்து மேற்கு தொடர்ச்சி மலையடிவராப் பகுதியில் 72 அடி கொள்ளளவு கொண்ட கருப்பா நதி அணை அமைந்துள்ளது. கருப்பா நதி அணையின் மூலமாக நேரடி மற்றும் மறைமுக பாசனம் வாயிலாக வைரவன் குளம், கிருஷ்ணாபுரம், இடைகால், சேர்ந்த மரம் மற்றும் வீரசிகாமணி உள்ளிட்ட 14கிராமங்கள் மூலம் 9514 ஏக்கர் நிலங்கள் பயன்பெறுகிறது.

இந்த நிலையில் மேற்கு தொடர்ச்சி மலைப் பகுதிகளில் பெய்து வந்த வடகிழக்கு பருவமழை காரணமாக அணை முழு கொள்ளளவை எட்டிய நிலையில் உபரி நீர் வெளியேற்று பட்டு வந்தது.

இதனைத் தொடர்ந்து மாவட்டத்தின் பல்வேறு இடங்களில் விவசாயிகள் பிசான சாகுபடி மேற்கொண்டு வரும் நிலையில், விவசாயிகள் பயன்பாட்டிற்காக 25 கன அடி விகிதம் இன்று முதல் (31-03-2024) 136 நாட்களுக்கு தண்ணீரை மாவட்ட ஆட்சியர் துரை.ரவிச்சந்திரன் திறந்து வைத்தார்.

மேலும் அவர் கூறுகையில், விவசாயிகள் பிசான சாகுபடி மேற்கொண்டு வரும் நிலையில் தண்ணீரை சிக்கனமாக பயன்படுத்தப்பட வேண்டும் எனவும் மேலும் உபரி நீர் திறந்து விடப்பட்டுள்ள நிலையில் கரையோர மக்கள் மேடான பகுதிகளுக்கு செல்ல வேண்டும் எனவும் எச்சரிக்கை விடுத்துள்ளார். இந்த நிகழ்ச்சியில் நாடாளுமன்ற உறுப்பினர் தனுஷ் எம்.குமார், பொதுப்பணித்துறை அதிகாரிகள் மற்றும் விவசாய பெருமக்கள் கலந்து கொண்டனர்.