கோலி சோடாவுக்கு வயது 100

தமிழ்நாட்டில் 1980-களில் குளிர்பானம் என்றதும்நினைவுக்கு வருவது கோலி சோடாதான். வீட்டுக்கு விருந்தினர் வந்ததும்பெட்டிக் கடை அல்லது பலசரக்கு கடைக்கு சென்று கோலி சோடா வாங்கித் தருவார்கள். அதன் பிறகு வெளிநாட்டு குளிர்பானங்கள் பிரபலமானது. குளிர்பானங்கள் எத்தனை வந்தாலும் கோலி சோடா மவுசு குறையவில்லை.

1970-ம் ஆண்டுக்கு முன்பிருந்தே கோலி சோடா விற்பனை இருந்தது. ஆரஞ்சு, மாங்கோ, லெமன், கிரேப் , பன்னீர் சோடா , சாதாரண சோடா (உப்பு சோடா) போன்ற பல வகைகள் விற்கப்பட்டன. அப்போது அதன் விலை 5 பைசா.

தமிழ்நாட்டில் முதன் முதலில் வேலூரில் தான் கோலி சோடா தயாரானது. வேலூரில் சுட்டெரிக்கும் வெயிலில் இருந்து தப்பிக்க அந்த காலத்திலேயே பலவிதமான குளிர்பானங்களை பருகத் தொடங்கினர்.

வேலூரை சேர்ந்த கண்ணுசாமி முதலியார் 1924-ம் ஆண்டு முதன் முதலில் கோலிசோடா தயாரித்து விற்பனை செய்ய விரும்பினார். இதற்காக ஜெர்மனியில் இருந்து கோலி சோடா பாட்டில் இறக்குமதி செய்தார்.

வேலூர் மாவட்டத்தில் சிறிய பெட்டி கடைகளுக்கு கோலி சோடா சப்ளை செய்யப்பட்டது. அந்த காலத்தில் சென்னை பெங்களூர் சாலையில் பயணம் செய்தவர்கள் வழியில் உள்ள கிராமங்களில் கோலி சோடா குடித்திருப்பதை மறந்திருக்க மாட்டார்கள். அந்த அளவுக்கு கோலி சோடா வேலூரில் பிரபலமாக இருந்தது.

முதன் முதலில் தயார் செய்யப்பட்ட கோலி சோடா பாட்டில் இன்றும் வேலூரில் உள்ள கண்ணன் சோடா கம்பனியில் அவரது தலைமுறையினர் பாதுகாப்பாக வைத்துள்ளனர். அதில் மேட் இன் ஜெர்மனி என எழுதப்பட்டுள்ளது.

தற்போது பழம் புளூபெர்ரி கோலா எலுமிச்சை மற்றும் ஆரஞ்சு பச்சை என பலவிதமான கோலி சோடாக்களை தயார் செய்து வருகின்றனர்.இங்கிருந்து வட மாவட்டங்கள் முழுவதும் இவர்கள் கோலிலசோடா விற்பனையை விரிவுபடுத்தி உள்ளனர்.

கண்ணுசாமி முதலியாரால் தொடங்கப்பட்ட கோலி சோடா 100-வது ஆண்டை எட்டி வருகிறது. இதுகுறித்து சோடா கம்பெனி உரிமையாளர்கள் கூறுகையில்:- கண்ணுசாமி முதலியார் சோடா கம்பனி தொடங்கிய போது உள்ளூரில் விற்பனை அதிகரித்தது. சுதந்திரத்திற்கு பிறகு கோலி சோடா விற்பனை மேலும் அதிகரித்தது .அந்த காலத்தில் ஜெர்மனியில் இருந்து பாட்டில்களை இறக்குமதி செய்தோம். தற்போது உத்தர பிரதேச மாநிலத்தில் இருந்து பாட்டில்கள் கொண்டு வந்து சோடா தயாரித்து வருகிறோம்.

1990-ம் ஆண்டு முற்பகுதி வரை சோடா விற்பனை அதிகமாக இருந்தது. அதற்கு பிறகு வெளிநாட்டு குளிர்பானங்கள் வந்ததால் ஓரளவு விற்பனை குறைந்தது. 2017-ம் ஆண்டு ஜல்லிக்கட்டு போராட்டத்தின் போது உள்ளூர் குளிர்பானங்களுக்கு அதிக முக்கியத்துவம் தர வேண்டும் என பொதுமக்களிடையே ஒரு பெரும் எழுச்சி ஏற்பட்டது. அதன் காரணமாக 2017-ம் ஆண்டுக்கு பிறகு கோலி சோடா விற்பனை புதிய உத்வேகத்தை ஏற்படுத்திவிட்டது என்று கூறினர்

மேலும் அவர்கள் கூறுகையில், முன்பு உள்ள கண்ணாடி பாட்டில்களைவிட இப்போதுள்ள கண்ணாடி பாட்டில்களின் எடை குறைவு. முன்பைவிட இப்போது உற்பத்திச் செலவும் அதிகம். அத்துடன் கோலி சோடா விற்பனைக்காக ஒரு நிறுவனத்தை தொடங்க அதனைப் பதிவு செய்து, உரிமம் பெற்று, மின் இணைப்பு வாங்கி ஆரம்பிக்க வேண்டியுள்ளது.

மேலும், கோலி சோடா உற்பத்திக்குத் தேவையான மூலப்பொருட்கள் விலையும், பணியாளர்களுக்கான சம்பளமும் மிக அதிகம். அதனால் உற்பத்தி செலவுக்கேற்ப விலை நிர்ணயம் செய்யப்படுகிறது. பலரும் எந்தப் பதிவும் இல்லாமல் விற்கின்றனர். அவர்கள் விற்பனை செய்யும் கண்ணாடி பாட்டிலில் எந்த தகவலும் இருக்காது. இதுபோன்ற விற்பனையை தடை செய்ய, கோலி சோடா விற்பனையை அரசு முறைப்படுத்த வேண்டும் என்று கூறினர்