திருப்பூர்; அரசு நலத்திட்டங்களைப் பெற சமூகநலத் துறை மூலம் சிறப்பு முகாம் நடத்த கோரிக்கை

Tirupur News,Tirupur News Today- திருப்பூா் மாநகரில் அரசின் நலத் திட்டங்களைப் பெற சமூகநலத் துறை சாா்பில், சிறப்பு முகாம்களை நடத்த வேண்டும் என்று மாா்க்சிஸ்ட் கம்யூனிஸ்ட் கட்சி வலியுறுத்தியுள்ளது.

இதுகுறித்து அக்கட்சியின் மாவட்ட செயற்குழு உறுப்பினா் ரங்கராஜ், நகரச் செயலாளா் நந்தகோபால், நகரக்குழு உறுப்பினா் சுகுமாா் ஆகியோா், மாவட்ட நிா்வாகத்திடம் அளித்த மனுவில் கூறியிருப்பதாவது,

மக்களுக்காக பல்வேறு நலத் திட்டங்களை தமிழக அரசு செயல்படுத்தி வருகிறது. குறிப்பாக, சமூகநலத் துறையின் கீழ் செயல்படுத்தப்படும் திட்டங்களில் ஏராளமானவா்கள் பயனடைந்து வருகின்றனா். எனினும், இந்தத் திட்டங்களின் பலன்களைப் பெறுவதற்காக நாள்தோறும் அரசு அலுவலகங்களுக்கு மக்கள் நடக்க வேண்டியுள்ளது. இதனால், மனித உழைப்பு வீணாவதுடன், காலவிரயமும், பெரும் அலைக்கழிப்பும், பண இழப்பும் ஏற்படுகிறது.

திருப்பூா் மாநகராட்சியின் முதலாம் மண்டலத்துக்கு உள்பட்ட வேலம்பாளையம், அனுப்பா்பாளையம், ரங்கநாதபுரம், பெரியாா் காலனி ஆகிய பகுதிகளில் பெற்றோரை இழந்த குழந்தைகளுக்கான மாதாந்திர உதவித்தொகை திட்டத்துக்காக 10-க்கும் மேற்பட்டோா் காத்திருப்பது தெரியவருகிறது. இதுமட்டுமின்றி, முதியோா் உதவித்தொகை பெற முடியாமல் பலா் அவதிக்குள்ளாகி வருகின்றனா்.

எனவே, சமூகநலத் துறை சாா்பில் வழங்கப்படும் திட்டங்களை மக்களிடம் கொண்டுச் சோ்க்கும் வகையில், திருப்பூா் மாநகராட்சி முதலாவது மண்டலத்துக்கு உள்பட்ட வேலம்பாளையம், அனுப்பா்பாளையம், ரங்கநாதபுரம், பெரியாா் காலனி உள்ளிட்ட பகுதிகளில் குறிப்பிட்ட கால இடைவெளியில் சிறப்பு முகாம்களை நடத்த வேண்டும் என்று மனுவில் தெரிவிக்கப்பட்டுள்ளது.