மத்திய அரசின் இடைக்கால நிதி நிலை அறிக்கை; திருப்பூா் தொழில் அமைப்புகள் வரவேற்பு

Tirupur News,Tirupur News Today- மத்திய அரசின் 2024-25 ம் ஆண்டுக்கான இடைக்கால நிதி நிலை அறிக்கையை மக்களவையில் மத்திய நிதியமைச்சா் நிா்மலா சீதாராமன் நேற்று (வியாழக்கிழமை) தாக்கல் செய்தாா். இந்த நிதி நிலை அறிக்கை தொடா்பாக திருப்பூரில் உள்ள தொழில் அமைப்புகள் பல்வேறு கருத்துகளை தெரிவித்துள்ளன.

ஏஇபிசி தென் பிராந்திய பொறுப்பாளா் ஆ.சக்திவேல்:

மத்திய அரசின் நிதி நிலை அறிக்கை எதிா்கால வளா்ச்சியை அடிப்படையாகக் கொண்டுள்ளதுடன், ஒரு வலுவான இந்தியாவை கட்டமைக்கும் நோக்கில் உள்ளதால் இதனை வரவேற்கிறோம்.

வேகமாக வளரும் இந்தியாவின் பொருளாதார அணிவகுப்பை எளிதாக்குவதாக உள்ளது. ஆயத்த ஆடைகள், ஜவுளி ஏற்றுமதிக்கான மாநில, மத்திய வரிகள் திரும்பப்பெறும் திட்டத்தை வரும் 2026 ஆம் ஆண்டு மாா்ச் 31 ம் தேதி வரை நீட்டிக்க அமைச்சரவை ஒப்புதல் அளித்துள்ளது ஆடை ஏற்றுமதியாளா்களுக்கு மகிழ்ச்சி அளிக்கக்கூடியதாகும்.

இது ஏற்றுமதியாளா்கள் மத்தியில் போட்டித்தன்மையை மேம்படுத்தவும், எதிா்காலத்துக்கு திட்டமிடவும் உதவும். தொழில்நுட்ப மேம்படுத்துதல் திட்டத்திற்காக நிதி ஒதுக்கீடு செய்திருப்பது வரவேற்கத்தக்கது. இதன் மூலம் நிலுவையிலுள்ள தொகைகள் கூடிய விரைவில் விடுவிக்கப்படும்.

பி.எம்.மித்ரா திட்டத்துக்கான நிதியை உயா்த்தி வழங்கியிருப்பதன் மூலமாக இத்திட்டத்தின் செயலாக்கம் வரும் ஆண்டில் துரிதப்படுத்தப்படும் என்றாா்.

திருப்பூா் ஏற்றுமதியாளா்கள் சங்கத் தலைவா் கே.எம்.சுப்பிரமணியன்:

இடைக்கால நிதி நிலை அறிக்கையில் ஜவுளித் துறை சாா்ந்த அறிவிப்புகள் எதுவும் இல்லை என்ற போதிலும், இளைஞா்களின் தொழில்முனைவு மற்றும் வேலைவாய்ப்புகளை அதிகரிக்கும் வகையில் ஆராய்ச்சி மற்றும் கண்டுபிடிப்புகளுக்கு ஒரு லட்சம் கோடி காா்பஸ் நிதி ஒதுக்கீடு பற்றிய அறிவிப்பு ஜவுளித் துறையில் பல்வேறு தொழில்நுட்பங்களையும், இயந்திரங்களையும் உருவாக்குவதற்கான வாய்ப்பை ஏற்படுத்திக் கொடுக்கும்.

அடிப்படை கட்டமைப்பு வசதிகளுக்காக 11.1 சதவீதம் அதிகரித்திருப்பது தொழில் வளா்ச்சிக்கு உதவிகரமாக இருக்கும். கடந்த 2009-10 ஆம் நிதியாண்டு வரை ரூ.25 ஆயிரம் மற்றும் 2014-15 ஆம் நிதியாண்டு வரை ரூ.10 ஆயிரத்துக்குள்ளான வரி நிலுவைகளை மொத்தமாக ரத்து செய்தது வரவேற்கத்தக்கது. இதன் மூலமாக ஒரு கோடி வரிசெலுத்துவோா் பயனடைவா்.

மெட்ரோ ரயில் திட்டம் நாட்டின் பல்வேறு நகரங்களுக்கு விரிவுபடுத்தப்படும் என்கிற அறிவிப்பும், கோவை மெட்ரோ ரயில் திட்டம் திருப்பூா் வரை நீட்டிக்க இந்த அறிவிப்பின் வாயிலாக வாய்ப்பு உள்ளதாக நம்புகிறோம்.

காா்பன் சமநிலை குறித்த அறிவிப்பு, தொழில் ஆராய்ச்சிகளுக்கான அதிக நிதி ஒதுக்கீடு உள்ளிட்ட பல்வேறு சிறப்பம்சங்கள் இடம் பெற்றுள்ளதாக இந்த நிதி நிலை அறிக்கை வரவேற்கத்தக்கது என்றாா்.

தென்னிந்திய பின்னலாடை உற்பத்தியாளா்கள் சங்கத் தலைவா் வைகிங் ஏ.சி.ஈஸ்வரன்:

தனிநபா் வருமான வரி ரூ.7 லட்சம் வரை வரிசெலுத்தத் தேவையில்லை. 2 கோடி குடும்பங்களுக்கு புதிய வீடுகள் கட்டிக் கொடுத்தல். மகளிா் சுய உதவிக்குழுக்கள் மூலமாக பெண் முதலீட்டாளா்களை உருவாக்குதல். இளைஞா்களுக்கு கடனுதவி வழங்க ஒரு லட்சம் கோடி நிதித்தொகுப்பு ஏற்படுத்தப்படும் என்பன உள்ளிட்ட அனைத்து திட்டங்களும் வரவேற்கத்தக்கது என்றாா்.

திருப்பூா் ஏற்றுமதியாளா்கள் மற்றும் உற்பத்தியாளா்கள் சங்கத் தலைவா் எம்.பி.முத்துரத்தினம்:

இந்திய அளவில் விவசாயத்துக்கு அடுத்தபடியாக ஜவுளித்தொழில் உள்ளது. இந்த ஜவுளித் தொழிலில் 90 சதவீதம் குறு, சிறு மற்றும் நடுத்தர தொழில் நிறுவனங்கள் ஈடுபட்டுள்ளன. இந்த நிதி நிலை அறிக்கையில் ஜவளித்தொழிலை ஊக்கப்படுத்தும் வகையிலான திட்டங்களோ, சலுகைகளோ இல்லாதது ஏமாற்றம் அளிக்கிறது.

தொழில் துறையினா் நீண்டகாலமாக எதிா்பாா்த்திருந்த ஜவுளித் தொழிலுக்கான தனி வாரியம் குறித்த அறிவிப்பு இல்லாததும் ஏமாற்றம் அளிக்கிறது. நாட்டின் அடிப்படை கட்டமைப்புகளுக்கு முக்கியத்துவம் கொடுத்துள்ளது மிகவும் வரவேற்கத்தக்கது. வெளிநாட்டு காா்ப்பரெட் நிறுவனங்களுக்கு சலுகைகளை வழங்கும் அரசு குறு, சிறு மற்றும் நடுத்தர தொழில்களைப் பாதுகாப்பதற்கான சலுகைகளை அறிவிக்காதது ஏமாற்றம் அளிக்கிறது, என்றாா்.