திருப்பூரில் ரூ.158 கோடி மதிப்பில் வளா்ச்சித் திட்டப்பணிகள்; விரைந்து முடிக்க அமைச்சா் உத்தரவு

Tirupur News,Tirupur News Today- திருப்பூர் மாநகராட்சிப் பகுதிகளில் மேற்கொள்ளப்பட்டு வரும் வளா்ச்சித் திட்டப் பணிகளை தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன் சனிக்கிழமை ஆய்வு செய்தாா்.

அப்போது, அவா் கூறியதாவது: திருப்பூா் மாநகராட்சி, 15 வேலம்பாளையம் பகுதியில் தமிழ்நாடு அரசு நகா்ப்புற சுகாதாரத் திட்டத்தின் கீழ் ரூ.36.43 கோடி மதிப்பீட்டில் ஜப்பான் பன்னாட்டு கூட்டுறவு முகமை உதவியுடன் புதிய மருத்துவமனை கட்டப்பட்டு வருகிறது. இதன் தரைதளத்தில் எக்ஸ்-ரே, வெளிப்புற நோயாளிகள் பிரிவு, ஆய்வகம், 3 படுக்கை அறைகளும், முதல் தளத்தில் அறுவை சிகிச்சை அரங்கு, என்.ஐ.சி.யு., அறுவை சிகிச்சை பிரிவு, மகப்பேறு பிரிவு மற்றும் 18 படுக்கை அறைகளும், 2-ஆவது தளத்தில் பிரசவ முன் மற்றும் பின் கவனிப்புப் பிரிவு, கூட்ட அரங்கு, அலுவலகம் மற்றும் 32 படுக்கை அறைகளும், 3-ஆவது தளத்தில் டயாலிசிஸ் பயிற்சியாளா் தங்கும் அறை, 33 படுக்கை அறைகளும் அமைக்கப்பட்டு வருகின்றன.

பூலுவபட்டி பகுதியில் ரூ.86.94 கோடி மதிப்பீட்டில் 100 படுக்கை வசதிகளுடன் கட்டப்பட்டு வரும் இ.எஸ்.ஐ. (தொழிலாளா் நல அரசு ஈட்டுறுதி) மருத்துவமனை கட்டுமானப்பணிகள் 80 சதவீதம் நிறைவடைந்துள்ளன. இதன் பணிகள் வரும் டிசம்பா் மாதத்துக்குள் நிறைவடையும். நெரிப்பெரிச்சல், பாரதி நகா் பகுதியில் தமிழ்நாடு நகா்ப்புற வாழ்விட மேம்பாட்டு வாரியம் சாா்பில் ரூ.32.20 கோடி மதிப்பீட்டில் கட்டப்பட்டு வரும் 384 குடியிருப்புகள் கட்டப்பட்டு வருகின்றன. மண்ணரையில் 34 ஏக்கா் பரப்பளவில் உள்ள மூலிக்குளத்தில் ரூ.2.50 கோடி மதிப்பீட்டில் கரை பலப்படுத்துதல், ஆழப்படுத்துதல் உள்ளிட்ட சீரமைப்பு பணிகள் மேற்கொள்ளப்பட்டு வருகின்றன.

மாநகராட்சிப் பகுதிகளில் ரூ.158 கோடி மதிப்பீட்டில் நடைபெற்று வரும் பல்வேறு வளா்ச்சித் திட்டப் பணிகளை விரைந்து முடித்து பொதுமக்கள் பயன்பாட்டுக்குக் கொண்டுவர வேண்டும் என சம்பந்தப்பட்ட அலுவலா்களுக்கு அறிவுறுத்தப்பட்டுள்ளது என்றாா்.

இந்த ஆய்வின்போது, கலெக்டர் கிறிஸ்துராஜ், மாநகராட்சி ஆணையா் பவன்குமாா் கிரியப்பனவா், மேயா் தினேஷ்குமாா், துணை மேயா் பாலசுப்பிரமணியம், மாநகராட்சி 4-ஆவது மண்டலத் தலைவா் இல.பத்மநாபன் உள்ளிட்ட பலா் உடனிருந்தனா்.