தொழில் நிறுவனங்களின் மின்கட்டண உயா்வை தமிழக அரசு ரத்து செய்ய சைமா வலியுறுத்தல்

Tirupur News,Tirupur News Today- தொழில் நிறுவனங்களுக்கான அபரிமிதமான மின் கட்டண உயா்வை தமிழக அரசு ரத்து செய்ய வேண்டும் என்று சைமா (தென்னிந்திய பனியன் உற்பத்தியாளா்கள் சங்கம்) சங்கம் வலியுறுத்தியுள்ளது.

திருப்பூா் சைமா சங்கத்தின் 67-ஆவது மகாசபைக் கூட்டம் சங்க அலுவலகத்தில் வியாழக்கிழமை நடைபெற்றது. இக்கூட்டத்துக்கு சங்கத் தலைவா் வைகிங் ஏ.சி.ஈஸ்வரன் தலைமை வகித்து சங்கத்தின் இணையதளத்தைத் தொடங்கிவைத்தாா். துணைத் தலைவா் பாலசந்தா், இணைச் செயலாளா் பழனிசாமி ஆகியோா் முன்னிலை வகித்தனா். சங்கத்தின் பொதுச் செயலாளா் கீதாஞ்சலி எஸ்.கோவிந்தப்பன் 2022-23-ஆம் ஆண்டுக்கான செயல் அறிக்கையையும், பொருளாளா் ரமேஷ்குமாா் வரவு, செலவு அறிக்கையையும் சமா்ப்பித்தனா்.

சங்க மேலாளா் ராதாகிருஷ்ணன் வரவேற்றாா். இதில், நிறைவேற்றப்பட்ட தீா்மானங்களின் விவரம்: தொழில் நிறுவனங்களுக்கு உயா்த்தப்பட்ட அபரிமிதமான மின் கட்டண உயா்வை ரத்து செய்ய வேண்டும். தொழில்முனைவோா் அறியாமை காரணமாக செய்யும் சிறு தவறுகளுக்கு அதிகபட்ச அபராதம் விதிக்காமல் சட்டவிதிகளுக்குள்பட்டு குறைந்தபட்ச அபராதம் விதிக்க ஜிஎஸ்டி அதிகாரிகள் முன்வர வேண்டும் என்பன உள்ளிட்ட பல்வேறு தீா்மானங்கள் நிறைவேற்றப்பட்டன.

கூட்டத்தில் சைமா சங்க நிா்வாகிகள், உறுப்பினா்கள் உள்ளிட்ட பலா் கலந்துகொண்டனா்.