திருப்பூரில் பொதுமக்கள் குறைகேட்புக் கூட்டம்; 414 மனுக்கள் குவிந்தன!

Tirupur News,Tirupur News Today- மரங்களை வெட்டிக் கடத்துபவா்கள் மீது நடவடிக்கை எடுக்காத வருவாய்த் துறையினா் மீது நடவடிக்கை எடுக்கக்கோரி சமூக ஆா்வலா் கூட்டமைப்பு சாா்பில் ஆட்சியா் அலுவலகத்தில் மனு அளிக்கப்பட்டது.

திருப்பூா் ஆட்சியா் அலுவலகத்தில் மாவட்ட வருவாய் அலுவலா் ஜெய்பீம் தலைமையில் பொதுமக்கள் குறைகேட்புக் கூட்டம் நடைபெற்றது.

இதில், பல்லடம் சமூக ஆா்வலா் கூட்டமைப்பு தலைவா் அண்ணாதுரை அளித்துள்ள மனுவில் கூறியுள்ளதாவது:

பல்லடம் வட்டத்தில் தொடா்ந்து மரங்களை வெட்டிக் கடத்தும் சம்பவங்கள் நடைபெற்று வருகின்றன. கடந்த வாரம்கூட தெற்குபாளையம் குட்டையில் 100-க்கும் மேற்பட்ட மரங்களை வெட்டிக் கடத்தியுள்ளனா். இந்த மரங்களின் மதிப்பு ரூ. பல லட்சம். இது குறித்து பல்லடம் வட்டாட்சியரிடம் மனு அளித்தும் எந்தவிதமான நடவடிக்கையும் எடுக்கப்படவில்லை.

எனவே, நீா் நிலைகளில் உள்ள மரங்களை வெட்டும் நபா்கள் மீதும், மரங்களை வெட்டிக் கடத்துபவா்கள் மீது நடவடிக்கை எடுக்காத கிராம நிா்வாக அலுவலா் உள்ளிட்ட வருவாய்த் துறை அதிகாரிகள் மீதும் உரிய நடவடிக்கை எடுக்க வேண்டும் என்று தெரிவிக்கப்பட்டுள்ளது.

வழித்தட ஆக்கிரமிப்பை அகற்ற வேண்டும்:

இது குறித்து பொதுமக்கள் அளித்துள்ள மனுவில் கூறியுள்ளதாவது: இடுவாய் ஊராட்சிக்குள்பட்ட ஆண்டிபுல்லாங்காடு பகுதியில் 150-க்கும் மேற்பட்ட குடும்பத்தினா் கடந்த 50 ஆண்டுகளாக வசித்து வருகிறோம். இந்நிலையில், ஆண்டிபுல்லாங்காட்டுக்கு செல்லும் பொதுவழித்தடத்தை தனிநபா் ஒருவா் ஆக்கிரமித்து கட்டடப் பணிகளை மேற்கொண்டு வருகிறாா். இதுதொடா்பாக அவரிடம் கேட்டபோது என்னுடைய இடத்தில் அப்படித்தான் கட்டடம் கட்டுவேன் என்று தெரிவிக்கிறாா். இந்தப் பாதையில் ஏற்கெனவே ஊராட்சி நிா்வாகம் சாா்பில் கான்கிரீட் சாலை அமைக்கப்பட்டுள்ளது. எனவே, பொதுவழித்தட ஆக்கிரமிப்பை அகற்ற நடவடிக்கை எடுக்க வேண்டும் என்று தெரிவிக்கப்பட்டுள்ளது.

மதுக்கூடத்தை அகற்ற வேண்டும்:

இந்திய கம்யூனிஸ்ட் கட்சியின் 2-வது மண்டலக் குழு சாா்பில் பொதுமக்கள் அளித்துள்ள மனுவில் கூறியுள்ளதாவது:

திருப்பூா் இ.எஸ்.ஐ.மருத்துவமனை அருகே உள்ள ரங்கநாதபுரம் பகுதியில் மதுக்கூடத்துடன் கூடிய டாஸ்மாக் மதுக்கடை செயல்பட்டு வருகிறது. பொதுமக்களுக்கு இடையூறாக உள்ள இந்த மதுக்கடையை மூடக்கோரி நீண்டகாலமாக போராட்டத்தில் ஈடுபட்டு வருகிறோம். இதைத்தொடா்ந்து, 2 மாதத்துக்குள் கடை இடமாற்றம் செய்யப்படும் என்று அறிவிப்பு பதாகை கடையின் முன் வைக்கப்பட்டது. ஆனால், அடுத்த நாளே மதுக்கூட உரிமையாளா்கள் அந்தப் பதாகையை கழற்றி வீசிவிட்டனா். இதுதொடா்பாக டாஸ்மாக் மாவட்ட மேலாளரிடம் புகாா் அளித்தும் எந்தவிதமான நடவடிக்கையும் எடுக்கவில்லை.

மேலும், மதுக்கூடத்தின் உரிமமும் கடந்த மாதமே காலாவதியாகி விட்டதாகத் தெரிகிறது. எனவே, உரிமம் இல்லாமல் செயல்பட்டு வரும் மதுக்கூடத்தை உடனடியாக மூட வேண்டும் என்று தெரிவிக்கப்பட்டுள்ளது. மேலும், பல்வேறு கோரிக்கைகளை வலியுறுத்தி குறைகேட்புக் கூட்டத்தில் 414 மனுக்களை பொதுமக்கள் அளித்தனா்.