திருப்பூா்; தனியாா் வேலை வாய்ப்பு முகாமில் ரூ.1.35 கோடி மதிப்பிலான நலத்திட்ட உதவிகள் வழங்கல்

Tirupur News,Tirupur News Today- திருப்பூா் மாவட்டத்தில் நடைபெற்ற தனியாா் வேலை வாய்ப்பு முகாமில் 43 பயனாளிகளுக்கு ரூ.1.35 கோடி மதிப்பிலான நலத் திட்ட உதவிகளை அமைச்சா்கள் மு.பெ.சாமிநாதன், என்.கயல்விழி செல்வராஜ் ஆகியோா் வழங்கினா்.

திருப்பூா் மாவட்ட நிா்வாகம், மாவட்ட வேலை வாய்ப்பு அலுவலகம், மகளிா் திட்ட அலுவலகம் ஆகியவை சாா்பில் மாவட்ட அளவிலான வேலை வாய்ப்பு முகாம் மற்றும் இளைஞா் திறன் திருவிழா ஆகியவை நடைபெற்றன.

இதில், தாட்கோ சாா்பில் 43 பயனாளிளுக்கு ரூ.1.35 கோடி மதிப்பிலான நலத் திட்ட உதவிகளை தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன், ஆதிதிராவிடா் நலத் துறை அமைச்சா் என்.கயல்விழி செல்வராஜ் ஆகியோா் வழங்கினா்.

இம்முகாமில், 150-க்கும் மேற்பட்ட முன்னனி தனியாா் துறை நிறுவனங்கள் கலந்துகொண்டு தங்களது நிறுவனங்களுக்குத் தேவையான நபா்களைத் தோ்வு செய்தனா். இதில், 10-ம் வகுப்பு, பிளஸ் -2, ஐடிஐ, டிப்ளமோ, பொறியியல் மற்றும் தொழிற்கல்வி பயின்றவா்கள், கணினி இயக்குபவா்கள், ஓட்டுநா்கள் உள்ளிட்ட பலா் பங்கேற்றனா்.

இதில், தோ்வானவா்களுக்கு பணி நியமன ஆணைகள் மற்றும் மாவட்ட வேலை வாய்ப்பு மற்றும் தொழில்நெறி வழிகாட்டு மையத்தின் தன்னாா்வலா் பயிலும் வட்டத்தில் பயின்று தமிழ்நாடு அரசுப் பணியாளா் தோ்வாணையத்தில் தோ்வான 2 நபா்களுக்கு கேடயங்களையும் அமைச்சா்கள் வழங்கினா்.

இந்நிகழ்ச்சியில், மாவட்ட ஊரக வளா்ச்சி முகமையின் திட்ட இயக்குநா் அ.லட்சுமணன், திருப்பூா் மாநகராட்சி 4-ஆவது மண்டலத் தலைவா் இல.பத்மநாபன், மண்டல இணை இயக்குநா் (வேலை வாய்ப்பு) ஆ.ஜோதி மணி, திட்ட இயக்குநா் (மகளிா்த் திட்டம்) சோ.வரலட்சுமி, பொது மேலாளா் (தாட்கோ) ரஞ்சித்குமாா், முன்னோடி வங்கி மேலாளா் ரவி, மாவட்ட வேலை வாய்ப்பு அலுவலா் ஆா்.சுரேஷ் உள்ளிட்டோா் கலந்து கொண்டனா்.