கிராம சபை கூட்டத்தில் கலாட்டா

தாராபுரம் அருகேயுள்ள அம்மாபட்டி அரசு ஆரம்பப்பள்ளியில் சிறப்பு கிராம சபை கூட்டம் நடத்தப்படும் என, கவுண்டச்சிபுதூர் ஊராட்சி சார்பில் அறிவிக்கப்பட்டிருந்தது. ஊராட்சிக்குட்பட்ட 30க்கும் மேற்பட்ட கிராம மக்கள், அம்மாபட்டி அரசு பள்ளி வளாகத்திற்கு வந்தனர்.

பள்ளி வளாகம் முழுக்க மழைநீர் சூழ்ந்து, குளம் போல் இருந்ததால், மக்கள் நடந்து செல்ல சிரமம் ஏற்பட்டதால், கிராம சபை கூட்டம் பள்ளி எதிரே உள்ள சாலையோரம் நடைபெற்றது. அடிப்படை வசதிகளான குடிநீர், தெரு விளக்கு, சாக்கடை வசதிகளை நிறைவேற்றி தர வேண்டும் என, பொதுமக்கள் வலியுறுத்தினர்.

பல ஆண்டுகளாக பாலசுப்பிரமணியர் நகர் பகுதியில் தார் சாலை அமைப்பதில் ஊராட்சி நிர்வாகம் மெத்தனம் காட்டி வருவதாக புகார் தெரிவிக்கப்பட்டது. இதுதொடர்பான வழக்கு நீதிமன்றத்தில் உள்ளதாக, ஊராட்சி நிர்வாகம் சார்பில் தெரிவிக்கப்பட்டது.

கூட்டத்தில், 6 வார்டு உறுப்பினர்கள் மட்டுமே வந்திருந்ததால், பொதுமக்கள் தங்கள் பிரச்னைகளை முன்வைக்க முடியவில்லை. கண்ணகி நகர், நேருநகர், நரிக்குறவர் காலனி உள்ளிட்ட பல பகுதிகளில், ஊராட்சி நிர்வாகத்தால் குப்பைகள் அள்ளப்படுவதில்லை; ஊராட்சி நிர்வாகத்தில் பல லட்சம் ரூபாய் முறைகேடு நடந்துள்ளது என்பது போன்ற அடுத்தடுத்த புகார் கிளம்பியதால், சலசலப்பு ஏற்பட்டது. வரும், ஜனவரி, 26ம் தேதி நடக்க இருக்கிற கிராம சபை கூட்டத்தில், கலெக்டர், மாவட்ட வருவாய் அலுவலர் ஆகியோர் கட்டாயம் பங்கேற்க வேண்டும் என மக்கள் தெரிவித்தனர். தீர்மானம் எதுவும் நிறைவேற்றப்படாமல் சிறப்பு கிராம சபை கூட்டம் முடிந்தது.