தாராபுரம் அருகே கார் மோதி கல்லூரி மாணவி உயிரிழப்பு

திருப்பூர் மாவட்டம் தாராபுரம் அருகேயுள்ள கணபதிபாளையம் பகுதியைச் சேர்ந்தவர் செல்வம், சாக்கு வியாபாரி. இவர் கடந்த சில மாதங்களுக்கு முன்பு உடல்நலக்குறைவால் இறந்து விட்டார். இவரது மகள் விஜயஸ்ரீ (வயது19). இவர் தாயார் அரவணைப்பில் வளர்ந்து வந்தார். விஜயஸ்ரீ தாராபுரம் பைபாஸ் சாலையில் உள்ள தனியார் கலைக்கல்லூரியில் 2-ம் ஆண்டு படித்து வந்தார்.

இவர் நேற்று மாலை கல்லூரி முடிந்து மோட்டார் சைக்கிளில் வீடு திரும்பி கொண்டிருந்தார். தாராபுரம் ஐ.டி.ஐ., கல்லூரி அருகே வந்த போது எதிரே வந்த சொகுசு கார் அவர் மீது மோதியது. இதில் பலத்த காயம் அடைந்த விஜயஸ்ரீயை அந்த பகுதியை சேர்ந்தவர்கள் மீட்டு சிகிச்சைக்காக தாராபுரம் அரசு மருத்துவமனையில் சேர்த்தனர். அங்கு அவருக்கு முதலுதவி சிகிச்சை அளிக்கப்பட்டது.

இதையடுத்து மேல் சிகிச்சைக்காக மதுரை தனியார் மருத்துவமனைக்கு கொண்டு சென்றனர். ஆனால் செல்லும் வழியிலேயே விஜயஸ்ரீ உயிரிழந்தார். இந்த விபத்து தொடர்பாக காரை ஓட்டி வந்த கோவையை சேர்ந்த அஸ்வின் (30) என்பவரை தாராபுரம் போலீசார் கைது செய்து விசாரணை நடத்தி வருகின்றனர். கார் விபத்தில் மாணவி பலியான சம்பவம் அந்த பகுதியில் சோகத்தை ஏற்படுத்தியுள்ளது.