அசைந்தாடி வரும் அவினாசிலிங்கேஸ்வரர் கோவில் தேர்- பக்தர்கள் வழிபாடு

திருப்பூர் மாவட்டம், அவினாசியில் உள்ள பெருங்கருணை நாயகி உடன்மர் அவினாசி லிங்கேசுவரர் கோவில், கொங்கு ஏழு சிவாலயங்களில் முதன்மை பெற்றதாகவும், காசிக்கு நிகரான கோவில் என்ற சிறப்பும் பெற்றுள்ளது.

கடந்த 2 வருடங்களாக கொரோனா தாக்கம் காரணமாக, இங்கு தேர்த்திருவிழா நடைபெறவில்லை. இந்தாண்டு நிலைமை சீரடைந்ததால், தேர்த்திருவிழா நடத்த முடிவானது. அதன்படி, கடந்த 5-ம் தேதி, கொடியேற்ற நிகழ்ச்சியுடன் தேர்த்திருவிழா தொடங்கியது.

அடுத்த நாள், 6- ம் தேதி சூரியசந்திர மண்டல காட்சிகளும், 7-ம் தேதி அதிகார நந்தி, கிளி, பூதம், அன்ன வாகன காட்சிகள், 8-ம் தேதி புஷ்ப பல்லக்கில் கைலாச வாகன காட்சி உள்ளிட்டவை நடைபெற்றன.அதை தொடர்ந்து, பஞ்சமூர்த்திகள் புறப்பாடு, 63 - நாயன்மார்களுக்கு காட்சியளித்தல் நிகழ்ச்சி நடந்தது. பின்னர், கற்பகவிருட்ச விழா, இரவு திருக்கல்யாண நிகழ்ச்சி, யானை வாகன காட்சிகள் நடைபெற்றன.

விழாவின் முக்கிய நிகழ்வான திருத்தேரோட்டம் இன்று தொடங்கி நடைபெற்று வருகிறது. இன்று காலை 6 மணிக்கு பஞ்சமூர்த்திகளும், பெருமாளும் திருத்தேருக்கு எழுந்தருளினர். பின்னர், அமைச்சர் சாமிநாதன் உள்ளிட்டோர், திருத்தேரை வடம் பிடித்து இழுத்து தொடங்கி வைத்தனர். நாளையும், நாளை மறுநாளும் திருத்தேர் வடம் பிடித்து நிலை சேர்க்கப்படும். வரும் 14-ம் தேதி காலை 8 மணிக்கு அம்மன் தேர் வடம்பிடித்து இழுத்துநிலை சேர்க்கப்படுகிறது.

திருத்தேர் விழாவை முன்னிட்டு அவினாசி நகரம் விழாக்கோலம் பூண்டுள்ளது. திருப்பூர் மட்டுமின்றி, ஈரோடு, கோவை மாவட்டத்தில் இருந்து பல ஆயிரம் பக்தர்கள் விழாவில் கலந்து கொண்டுள்ளனர்.