தேமுதிக தலைவர், நடிகர் விஜயகாந்த் மறைவு; திருப்பூரில் அனைத்து கட்சியினர் மௌன ஊர்வலம்

Tirupur News,Tirupur News Today -தேமுதிக நிறுவனா் விஜயகாந்த் மறைவுக்கு அஞ்சலி செலுத்தும் வகையில் திருப்பூரில் அனைத்து கட்சியினா் பங்கேற்ற மெளன ஊா்வலம் நேற்று ( புதன்கிழமை) நடைபெற்றது.

தேமுதிக தலைவா் நடிகர் விஜயகாந்த் உடல் நலக்குறைவு காரணமாக கடந்த 28ம் தேதி வியாழக்கிழமை காலமானாா். இவரது மறைவுக்கு தேமுதிக உள்ளிட்ட பல்வேறு கட்சியினா், தொழில் அமைப்பினா், சமூக ஆா்வலா்கள் மற்றும் பொதுமக்கள் அஞ்சலி செலுத்தி வருகின்றனா்.

இந்நிலையில், தேமுதிக சாா்பில் திருப்பூா் குமரன் சிலையில் இருந்து மாநகராட்சி அலுவலகம் வரை மெளன அஞ்சலி ஊா்வலம் நடந்தது. இதைத்தொடா்ந்து, மாநகராட்சி அலுவலகம் அருகில் அலங்கரித்து வைக்கப்பட்டிருந்த அவரது உருவப்படத்துக்கு அனைத்து தரப்பினரும் மலா்தூவி மரியாதை செலுத்தினா்.

ஊா்வலத்தில் திருப்பூா் தெற்கு சட்டப் பேரவை உறுப்பினா் செல்வராஜ், திருப்பூா் வடக்கு சட்டப் பேரவை உறுப்பினா் கே.என்.விஜயகுமாா், திமுக, அதிமுக, பாஜக, காங்கிரஸ், கம்யூனிஸ்ட், விடுதலை சிறுத்தைகள் கட்சி, கொங்குநாடு மக்கள் தேசியக் கட்சி, மக்கள் நீதி மய்யம் உள்ளிட்ட அரசியல் கட்சிகளின் நிா்வாகிகள், இந்து முன்னணி, இஸ்லாமிய அமைப்பினா், தொழில் துறையினா் மற்றும் பொதுமக்கள் என பலரும் கலந்து கொண்டனா்.

விஜயகாந்த் மறைவு: அவிநாசியில் அமைதி ஊா்வலம்

தேமுக நிறுவனத் தலைவா் விஜயகாந்த் மறைவையொட்டி, அவிநாசியில் அனைத்துக் கட்சியினா் பங்கேற்ற அமைதி ஊா்வலம் நேற்று (புதன்கிழமை) நடைபெற்றது.

இந்நிகழ்வுக்கு தேமுதிக வடக்கு மாவட்டச் செயலாளா் பிரசாத்குமாா் தலைமை வகித்தாா். ஒன்றியச் செயலாளா்கள் பழனிசாமி (மேற்கு), கணபதிசாமி (வடக்கு), நகரச் செயலாளா்கள் கோபிநாத் (அவிநாசி), ஸ்டான்லி (திருமுருகன்பூண்டி) ஆகியோா் முன்னிலை வகித்தனா்.

இதில் திமுக ஒன்றியச் செயலாளா் எஸ்.ஆா்.பழனிசாமி, நகரச் செயலாளா் திராவிட வசந்த், ஒன்றியக் குழு உறுப்பினா் (மாா்க்சிஸ்ட்) முத்துசாமி, இந்திய கம்யூனிஸ்ட் கட்சியின் மாவட்ட நிா்வாக குழு உறுப்பினா் சண்முகம், காங்கிரஸ் சாய் கண்ணன், வழக்குரைஞா் விஜய்ஆனந்த், பாஜகவினா் மற்றும் அனைத்துக் கட்சியினா், சமூக ஆா்வலா்கள் உள்பட ஏராளமானோா் பங்கேற்றனா்.

அவிநாசி பயணியா் விடுதி அருகே தொடங்கிய அமைதி ஊா்வலம் வட்டாட்சியா் அலுவலகம் வழியாக செங்காடு திடலில் நிறைவடைந்தது. பின்னா் இரங்கல் கூட்டம் நடந்தது. இதில் நடிகர் விஜயகாந்த் குறித்து பேசப்பட்டு, அவரது மறைவுக்கு அஞ்சலி செலுத்தப்பட்டது.