மேலப்பாளையத்தில் மது அருந்தி தகராறு செய்த மகன் அடித்துக் கொலை: தந்தை கைது

நெல்லை மாவட்டம், மேலப்பாளையம் ஆமின்புரத்தைச் சேர்ந்தவர் அப்துல்லா. இவரது மகன் அப்துல் ரகுமான்(27). இந்த நிலையில் இன்று அதிகாலை வீட்டில் தந்தை, மகன் இடையே தகராறு ஏற்பட்டுள்ளது. அப்போது ஆத்திரத்தில் அப்துல்லா தனது மகன் அப்துல் ரகுமானை வீட்டில் இருந்த குலவி கல்லால் தலையில் அடித்து கொலை செய்துள்ளார்.

பின்னர் மேலப்பாளையம் காவல் நிலையத்திற்கு தொடர்பு கொண்டு தனது மகனை கொலை செய்துவிட்டேன். என்னை அழைத்துச் செல்லுங்கள் என்று அவரே போலீசாரிடம் தகவல் தெரிவித்துள்ளார். அதன்பேரில் சம்பவ இடத்திற்கு சென்ற மேலப்பாளையம் போலீசார் சடலத்தை கைப்பற்றி உடற்கூறு ஆய்வுக்காக நெல்லை அரசு மருத்துவகல்லூரி மருத்துவமனைக்கு அனுப்பி வைத்தனர். பின்னர் அப்துல்லாவை கைது செய்தனர்.

இதுகுறித்து வழக்குப்பதிவு செய்து விசாரணை மேற்கொண்டதில் அப்துல் ரகுமான் வேலைக்கு எதுவும் சொல்லாமல், அடிக்கடி மது அருந்தி விட்டு தினமும் வீட்டில் தகராறில் ஈடுபட்டு வந்ததாக கூறப்படுகிறது. இந்நிலையில் நேற்றிரவு வழக்கம்போல் மதுபோதையில் வீட்டிற்கு வந்த அப்துல் ரகுமான் தனது தந்தையிடம் தகராறில் ஈடுபட்டதாக தெரிகிறது.

அதிகாலை வரை தந்தை, மகன் இடையே வாக்குவாதம் நீடித்துள்ளது. ஒருகட்டத்தில், வேலைக்கும் செல்லாமல் மது போதைக்கும் அடிமையாகிய தனது மகனை எண்ணி ஏற்கனவே மன வேதனையில் இருந்த அப்துல்லா, ஆத்திரத்தில் தான் பெற்ற மகன் என்றும் கூட பாராமல் குலவி கல்லை எடுத்து அப்துல் ரகுமான் தலையில் அடித்து கொலை செய்தது விசாரணையில் தெரியவந்துள்ளது. மதுவால் பெற்ற மகனை தந்தையை அடித்துக் கொலை செய்த சம்பவம் நெல்லையில் பரபரப்பை ஏற்படுத்தியுள்ளது.