கேரளாவுக்கு கடத்த முயன்ற ஒன்றரை டன் ரேஷன் அரிசி பறிமுதல்: 3 பேர் கைது

நெல்லை மேலப்பாளையம் பகுதியில் இருந்து கேரளாவுக்கு எடுத்துச் செல்லப்பட இருந்த ஒன்றரை டன் ரேஷன் அரிசியை போலீசார் பறிமுதல் செய்தனர். குற்றவாளிகள் 3 பேர் கைது.

நெல்லை மாவட்டம் மேலப்பாளையம் பகுதியில் ரேஷன் அரிசியை கள்ளச்சந்தையில் பதுக்கி வைத்து விற்பனை செய்வதாக போலீசாருக்கு தகவல் கிடைத்தது. அதன்பேரில் மேலப்பாளையம் காவல் நிலைய உதவி ஆய்வாளர் சாமி தலைமையிலான போலீசார் மேலப்பாளையம் அத்தியடி தெருவில் வாகன தணிக்கையில் ஈடுபட்டனர்.

அப்போது சந்தேகத்துக்கு இடமான வகையில் வந்த டாட்டா சுமோ கார் ஒன்றை மடக்கி சோதனையிட்ட போது உள்ளே பிளாஸ்டிக் சாக்கு மூட்டைகளில் ஒன்றரை டன் ரேஷன் அரிசி எடுத்துச் செல்லப்பட்டது தெரியவந்தது. இதையடுத்து நெல்லை உணவு கடத்தல் தடுப்பு பிரிவு போலீசாருக்கு தகவல் தெரிவிக்கப்பட்டது.

அதன்பேரில் போலீசார் காரை ஓட்டிவந்த பொட்டல் பகுதியைச் சேர்ந்த வேல்முருகன், பணகுடி பகுதியைச் சேர்ந்த கமலக்கண்ணன் மற்றும் கார்த்திக் ஆகிய 3 பேரையும் கைது செய்து அவர்களிடம் இருந்து கார் மற்றும் ரேஷன் அரிசியை பறிமுதல் செய்தனர்.

விசாரணையில் இங்கிருந்து ரேஷன் அரிசியை வள்ளியூருக்கு எடுத்து சென்று பதுக்கி வைக்கப்பட்டு, பின்னர் அங்கிருந்து நாகர்கோவில் வழியாக கேரள மாநிலத்தில் கள்ளச்சந்தையில் அதிக விலைக்கு அரிசியை விற்பனை செய்வது தெரிய வந்தது. கடத்தலுக்கு பயன்படுத்தப்பட்ட கார் மற்றும் ஒன்றரை டன் ரேஷன் அரிசியும் உணவு கடத்தல் தடுப்பு பிரிவு போலீசாரிடம் ஒப்படைக்கப்பட்டது.