கோவில்பட்டியில் ஆகஸ்ட் 12ம் தேதி தனியார் வேலைவாய்ப்பு முகாம்
கோவில்பட்டியில், ஆகஸ்ட் 12ம் தேதி, தனியார் வேலைவாய்ப்பு முகாம் நடக்கிறது. (மாதிரி படம்)
முன்னாள் முதல்வர் கருணாநிதியின் நூற்றாண்டு விழாவை முன்னிட்டு தமிழகம் முழுவதும் அரசு சார்பில் பல்வேறு நிகழ்ச்சிகள் நடைபெற்று வருகிறது. இந்நிலையில், தூத்துக்குடி மாவட்டம் கோவில்பட்டியில் ஆகஸ்ட் 12 ம் தேதி தனியார் வேலைவாய்ப்பு முகாம் நடத்தப்படுகிறது.
இதுகுறித்து, தூத்துக்குடி மாவட்ட ஆட்சியர் செந்தில்ராஜ் வெளியிட்ட செய்திக்குறிப்பு விவரம் வருமாறு:
தூத்துக்குடி மாவட்ட நிர்வாகம் மேற்பார்வையில், தூத்துக்குடி மாவட்ட வேலைவாய்ப்பு மற்றும் தொழில்நெறி வழிகாட்டும் மையம், தமிழ்நாடு மாநில ஊரக வாழ்வாதார இயக்கம் மற்றும் கோவில்பட்டி நாடார் மேல்நிலைப்பள்ளி ஆகியவை இணைந்து வேலை தேடும் இளைஞர்கள் அனைவரும் வேலைவாய்ப்பு பெறும் வகையில், சிறப்பு தனியார் துறை வேலைவாய்ப்பு முகாமை நடத்துகிறது.
அதன்படி, கோவில்பட்டி நாடார் மேல்நிலைப் பள்ளியில் 12.08.2023 அன்று காலை 9 மணிக்கு தனியார் வேலைவாய்ப்பு முகாம் நடைபெற உள்ளது. தூத்துக்குடி நாடாளுமன்ற உறுப்பினர் கனிமொழி, தமிழக சமூகநலன் – மகளிர் உரிமைத்துறை அமைச்சர் கீதாஜீவன், மீன்வளம்–மீனவர் நலத்துறை மற்றும் கால்நடை பராமரிப்புத்துறை அமைச்சர் அனிதா ராதாகிருஷ்ணன் ஆகியோர் கலந்து கொண்டு பணி நியமன ஆணைகளை வழங்க உள்ளார்கள்.
இந்த முகாமில் தூத்துக்குடி மாவட்டம் மற்றும் பல்வேறு மாவட்டங்களில் இருந்தும் 150-க்கும் மேற்பட்ட முன்னணி தனியார் நிறுவனங்கள் மற்றும் தமிழ்நாடு திறன்மேம்பாட்டு கழகத்தினால் அங்கீகரிக்கப்பட்ட திறன்பயிற்சி நிறுவனங்களும் பங்கேற்க உள்ளனர்.
இந்த மாபெரும் தனியார் துறை வேலைவாய்ப்பு முகாமில் 8 ஆம் வகுப்பு முதல் முதுநிலை பட்டதாரி, பொறியியல் பட்டதாரி, ஐடிஐ, டிப்ளமோ படித்தவர்கள் உள்ளிட்ட அனைவரும் கலந்துகொண்டு பயன்பெறலாம். முகாமில் கலந்துகொள்ள விருப்பம் உள்ளவர்கள் தங்களது சுயவிவரம், கல்விச்சான்று, ஆதார் அட்டை ஆகிய நகல்களுடன் வேலைவாய்ப்பு முகாம் நடைபெறும் நாளில் காலை 9 மணிக்கு வந்து பங்கேற்கலாம்.
மேலும், தனியார்துறை வேலைவாய்ப்பு இணையத்திலும் (www.tnprivatejobs.tn.gov.in) வேலைநாடுநர்கள் மற்றும் தனியார்துறை நிறுவனங்கள் தங்களது விபரங்களை பதிவுசெய்ய வேண்டும். வேலைவாய்ப்புமுகாம் தொடர்பான கூடுதல் விபரங்கள் அறிய Thoothukudi Employment office என்ற Telegram channel-ல் இணையவும்.
அந்த சேனலில் இணைய விரும்புவோர் உங்கள் செல்போனில் Telegram செயலியை பதிவிறக்கம் செய்யவேண்டும். பின்பு Thoothukudi Employment office என search செய்தால் channel தோன்றும். அதன் உள்நுழைந்து Join என்பதனை click செய்து எளிதில் channel இல் இணையலாம். மேலும் இந்த சிறப்பு வேலைவாய்ப்பு முகாமில் கலந்துகொண்டு தனியார் நிறுவனங்களில் பணியமர்த்தப்பட்டால் அவர்களின் வேலைவாய்ப்பு பதிவுமூப்பு ரத்து செய்யப்படமாட்டாது என்றும் தூத்துக்குடி மாவட்ட ஆட்சியர் செந்தில்ராஜ் தெரிவித்துள்ளார்.
