ரஜினி ரசிகர்களுக்கு ஜெயிலர் பட டிக்கெட் வழங்கி அ.தி.மு.க. மாநாட்டிற்கு அழைப்பு

மதுரையில் ஆகஸ்ட் 20 ஆம் தேதி அ.தி.மு.க. சார்பில் பொன்விழா எழுச்சி மாநாடு நடைபெறுகிறது. இந்நிலையில், தூத்துக்குடி மாவட்டம், கோவில்பட்டியில் முன்னாள் அமைச்சரும் கோவில்பட்டி சட்டமன்ற உறுப்பினருமான கடம்பூர் ராஜூ மாநாட்டிற்கு ரஜினி ரசிகர்களை அழைக்கும் விதமாக கோவில்பட்டி சத்தியபாமா திரையரங்கில் திரையிடப்பட்டுள்ள ஜெயிலர் திரைப்படத்தினை ரஜினி ரசிகர்கள் இலவசமாக பார்க்கும் வகையில் டிக்கெட் வழங்கினார்.

சுமார் 500 ரசிகர்களுக்கு இலவச டிக்கெட்களை வழங்கிய முன்னாள் அமைச்சர் கடம்பூர் ராஜூ , மதுரையில் நடைபெறும் மாநாட்டிற்கு ரஜினி ரசிகர்களை வரும்படி அழைப்பு விடுத்தார். இதில் ரஜினி ரசிகர் மன்ற நிர்வாகிகள் பலர் கலந்து கொண்டனர்.

தொடர்ந்து, முன்னாள் அமைச்சரும் கோவில்பட்டி சட்டமன்ற உறுப்பினருமான கடம்பூர் ராஜூ செய்தியாளரிடம் கூறியதாவது:-

மதுரை மாநாடு உலக சரித்திர புகழ் வாய்ந்த மாநாடாக நடைபெற உள்ளது. உலகத்திலேயே ஏழாவது பெரிய கட்சியாக அதிக உறுப்பினர்களைக் கொண்ட கட்சி அ.தி.மு.க. தமிழகத்தில் தற்போது நடைபெறும் தி.மு.க. ஆட்சியில் அவலங்களையும் ஏமாற்றங்களையும் பார்த்து மக்களின் பார்வை அ.தி.மு.க.வின் பக்கம் திரும்பி உள்ளது.

அ.தி.மு.க. மாநாட்டிற்கு நடிகர் ரஜினிகாந்த் ரசிகர்களையும் பொது மக்களையும் அழைக்கும் வகையில் திரையரங்குகளில் வெற்றிகரமாக ஓடிக்கொண்டிருக்கும் சூப்பர் ஸ்டார் ரஜினிகாந்த் நடித்த ஜெயிலர் திரைப்படத்தினை இலவசமாக பார்க்கும் வகையில் ஏற்பாடு செய்யப்பட்டுள்ளது. ரசிகர்களும் ஆர்வமுடன் மாநாட்டில் கலந்து கொள்வதாகவும் தெரிவித்துள்ளனர்.

அ.தி.மு.க. மாநாட்டுக்கு எதிராக சிலர் ஒரு குறிப்பிட்ட சமூகம் பேரில் போஸ்டர் ஒட்டியுள்ளனர். அ.தி.மு.க. அனைத்து மக்களுக்கான கட்சி. அந்த குறிப்பிட சமூகத்தைச் சேர்ந்த தலைவர்கள் தான் இன்றைக்கு மாநாட்டு பணியை முழுமையாக செய்து வருகின்றனர். இது போன்ற சலசலப்புக்கெல்லாம் அ.தி.மு.க. அஞ்சாது.

இவ்வாறு அவர் கூறினார்.