மக்கள் பிரச்னையை பேச முடியாத இடமாக நாடாளுமன்றம் மாறிவிட்டது: கனிமொழி எம்.பி. குற்றச்சாட்டு...

தமிழ் முற்போக்கு எழுத்தாளர் கலைஞர்கள் சங்க கலை இலக்கிய விருது வழங்கும் விழா தூத்துக்குடியில் நடைபெற்றது. நிகழ்ச்சியில், திமுக துணைப் பொதுச் செயலாளர் கனிமொழி எம்.பி, மதுரை நாடாளுமன்ற உறுப்பினர் வெங்கடேசன், தமிழ் முற்போக்கு எழுத்தாளர் கலைஞர்கள் சங்க மாநில தலைவர் மதுக்கூர் ராமலிங்கம் ஆகியோர் கலந்து கொண்டு எழுத்தாளர் மற்றும் கலைஞர்களுக்கு விருதுகளை வழங்கினர்.

நிகழ்ச்சியில், திமுக துணைப் பொதுச்செயலாளரும், தூத்துக்குடி நாடாளுமன்ற உறுப்பினருமான கனிமொழி பேசியதாவது:

நாடாளுமன்றம் என்பது இன்று கேள்விகள் கேட்கக்கூடாத இடமாகவும் வெறும் பாராட்டு பத்திரங்களை மட்டுமே படிக்க கூடிய இடமாக மாறி வருகின்றது. நாடாளுமன்றம் என்பது மக்களுடைய பிரச்னைகள், குறைகள், அச்சத்தினை எடுத்துரைக்கும் விதமாக இருக்க வேண்டும். ஆனால் கேள்வி நேரத்தில் கூட மக்கள் பிரச்னைகள் குறித்து பேச முடியாத நிலை நாடாளுமன்றத்தில் உள்ளது.

மதுரையில் அமைந்து வரும் ஏய்ம்ஸ் மருத்துவமனை குறித்த நிலை என்ன? என்பது தொடர்பாக நாடாளுமன்றத்தில் மத்திய அமைச்சரிடம் கேள்வி கேட்டால் அவர் அச்சுறுத்தும் விதமாக பதில் அளிக்கின்றார். சுறுக்கு கயிறு உங்கள் கழுத்தை நெறிக்கும் என்று சொல்லக்கூடிய அளவிற்கு ஒரு அமைச்சர் பதில் சொல்கின்றார் என்றால் நாட்டின் ஜனநாயகத்தின் நிலை என்னவாக இருக்கும் என்பதை உணர்ந்து கொள்ள வேண்டும்.

நாடாளுமன்றத்தில் பல அரசியல் இயகங்களும் எதிர்கட்சியினரும், மக்கள் பிரதிநிதிகளும் பிரதமரை நோக்கி கேள்வி கேட்டால், அவர் தரக்கூடிய ஒரே பதில் எதிர்கட்சிகளை சாடுவது. எந்த கேள்விக்கும் பதில் கூறாமல் கேள்வி கேட்பதே தவறு என்பதுபோல் கேள்வி கேட்பவர்களை குறைத்து பேசுவது நையாண்டி செய்வது, மிரட்டுவது, அச்சுறுத்துவது, போன்ற செயல்களை நாடாளுமன்றத்தில் நாங்கள் பார்த்துகொண்டு இருக்கின்றோம்.

மத்திய அரசை எதிர்த்து ஊடகங்களோ, எழுத்தாளர்களோ கேள்வி கேட்க முடியாத நிலையில் உள்ளது. அதைபோல் அரசின் தவறுகளை சுட்டிகாட்டுவது போன்ற ஒரு திரைப்படம் எடுத்தால் கூட அதனை வெளியிட முடியாத நிலை உருவாகி உள்ளது. இந்தியா என்பது ஒருவர்தான் போலவும், அந்த ஒருவர் யார் என்றால் அது பிரதமர் மோடி போலவும் இந்தியாவின் ஒட்டுமொத்த பிம்பம் என்பது அவராகதான் இருக்க வேண்டும் என்ற நிலையே உருவாக்க துடித்து கொண்டு இருக்கின்றார்கள்.

பிரதமர் மோடிக்கு பின்னால் இருக்கக்கூடிய ஒருவர் யார் என்ற கேள்வியை இன்று நாடே கேட்டுகொண்டு இருக்கின்றது. ஆனால், பதில் மவுனம். அரசியல் மட்டுமின்றி பதிவிகள், ஆளுமை, பொருளாதாரம் என்பது கூட அவர்களது கையில் பறித்து வைத்துகொள்ள கூடிய ஒன்றாக மாறிவிட வேண்டும் என்ற அந்த நிலையை நம்மை தள்ளி கொண்டு இருக்கின்றார்கள்.

இந்த நிலையெல்லாம் எதிர்த்து கேள்வி கேட்கக்கூடிய ஒன்றாக எழுத்தும், கலையும் தான் கேள்விகளின் விதைகளாக இருக்க முடியும். அந்த கேள்விகளை நாம் ஒவ்வொரு ஊராக சென்று மக்களிடம் கேட்க வைக்க வேண்டும். அது ஒன்றுதான் மாற்றத்தினை உருவாக்கும் என கனிமொழி எம்பி பேசினார்.

நிகழ்ச்சியில், தூத்துக்குடி மாநகராட்சி மேயர் ஜெகன் பெரியசாமி, வஉசி கல்லூரி முதல்வர் வீரபாகு, தமிழ் முற்போக்கு எழுத்தாளர் கலைஞர்கள் சங்க தூத்துக்குடி மாவட்ட தலைவர் ராமசுப்பு உள்ளிட்ட பலர் கலந்துகொண்டனர்.