உயிரிழந்த தலைமைக் காவலர் குடும்பத்துக்கு சக காவலர்கள் நிதி திரட்டி வழங்கல்

தூத்துக்குடி மாவட்டம் காவல்துறை தனிப்பிரிவு அலுவலகத்தில் பணியாற்றி வந்த தலைமை காவலர் துரைபாண்டி என்பவர் கடந்த 27.07.2023 அன்று உடல்நலக் குறைவால் காலமானார். இதையெடுத்து, துரைபாண்டி குடும்பத்திற்கு தனிப்பட்ட முறையில் தங்களால் இயன்ற நிதியுதவி செய்ய வேண்டும் என்ற கருணை உள்ளத்தோடு, அவருடன் 2003 ஆம் ஆண்டு காவலர் பணியில் சேர்ந்த தமிழகம் முழுவதும் உள்ள சக காவலர்கள் ஒன்று திரண்டு உதவும் கரங்கள் 2003 சார்பாக 29 லட்சத்து 28 ஆயிரத்து 500 ரூபாய் பணம் நன்கொடையாக பெற்றனர்.

அந்தத் தொகையை காப்பீட்டு பத்திரங்கள், காவலர் கூட்டுறவு சிக்கன நாணய சங்க வைப்புத் தொகை ரசீதுகளாக இன்று தூத்துக்குடி மாவட்ட காவல்துறை அலுவலகத்தில் 2003-ஆம் ஆண்டு காவலர்கள் முன்னிலையில் மறைந்த தலைமைக் காவலர் துரைப்பாண்டி குடும்பத்தினருக்கு மாவட்ட காவல் கண்காணிப்பாளர் பாலாஜி சரவணன் வழங்கி ஆறுதல் கூறினார்.

இந்த நிகழ்வின்போது தூத்துக்குடி தலைமையிடத்து காவல்துறை கூடுதல் கண்காணிப்பாளர் கார்த்திகேயன், தூத்துக்குடி சைபர் குற்ற பிரிவு காவல்துறை கூடுதல் கண்காணிப்பாளர் உன்னிகிருஷ்ணன் உட்பட காவல்துறையினர் உடனிருந்தனர்.

அப்போது, ஒற்றுமையுணர்வுடனும், கருணையுள்ளத்தோடும் நிதியை வழங்கிய 2003 ஆம் ஆண்டு காவல்துறையில் பணியில் சேர்ந்து தமிழ்நாடு முழுவதும் பல்வேறு காவல் நிலையங்களில் பணியாற்றி வரும் காவலர்களுக்கு, இந்த பெரிய நிதியுதவி அளித்தமைக்காக துரைப்பாண்டி குடும்பத்தார் சார்பாகவும், மாவட்ட காவல்துறை சார்பாகவும் தனது பாராட்டுக்களை காவல் கண்காணிப்பாளர் பாலாஜி சரவணன் தெரிவித்துக் கொண்டார்.

இந்நிகழ்வில் இந்த நிதியை திரட்டிய காவலர்கள் உதவும் கரங்கள் 2003 குழுவைச் சேர்ந்த பலர் கலந்து கொண்டனர்.