வங்கியில் போலி நகைகளை அடமானம் வைத்து ரூ. 15 லட்சம் மோசடி: இருவர் கைது

திருநெல்வேலி மாவட்டம், தாழையூத்து சங்கர்நகரை சேர்ந்தவர் முகமது சாகுல் ஹமீது (54). இவர், தூத்துக்குடி மாவட்டம், ஆத்தூர் புன்னக்காயல் பகுதியை சேர்ந்த தனுநாயகம் (33) என்பவருடன் கூட்டுச் சேர்ந்து, தூத்துக்குடி குறிஞ்சி நகர் பகுதியிலுள்ள ஒரு தனியார் நிதிநிறுவனத்தில் டச் குறைவான 91.6 ஹால் மார்க் முத்திரை பதிக்கப்பட்ட 30 பவுன் போலி தங்க நகைகளை, தங்க நகைகள் என்று கூறி ஏமாற்றி அடமானம் வைத்து ரூபாய் 10,13,820 கடன் பெற்றுள்ளார். மேலும், அந்த கடன் தொகையை திருப்பி செலுத்தாமல் இருந்துள்ளனர்.

இதேபோன்று, தூத்துக்குடியில் உள்ள ஒரு தனியார் வங்கியில் இருவரும் சேர்ந்து டச் குறைவான 91.6 ஹால் மார்க் முத்திரை பதிக்கப்பட்ட 15 பவுன் போலி தங்க நகைகளை அடமானம் வைத்து ரூபாய் 4,50,000 கடன் பெற்று உள்ளனர். இரண்டு இடங்களிலும் மொத்தம் ரூபாய் 14,63,820 பணம் பெற்று முகமது சாகுல் ஹமீதும், தனுநாயகமும் மோசடி செய்துள்ளனர்.

இதுகுறித்து நிதிநிறுவனம் மற்றும் தனியார் வங்கியின் மேலாளர்கள் கடந்த 27.03.2023 அன்று மாவட்ட காவல் கண்காணிப்பாளர் பாலாஜி சரவணனிடம் புகார் அளித்தனர். இதுகுறித்து மாவட்ட குற்றப் பிரிவு போலீசார் வழக்குபதிவு செய்து விசாரணை மேற்கொண்டனர்.

அந்த புகாரின் அடிப்படையில் மாவட்ட காவல் கண்காணிப்பாளர் உத்தரவின்பேரில் மாவட்ட குற்றப் பிரிவு காவல் துணை கண்காணிப்பாளர் ஜெயராம் மேற்பார்வையில், மாவட்ட குற்றப் பிரிவு காவல் ஆய்வாளர் அந்தோணியம்மாள் தலைமையிலான போலீசார் விசாரணை மேற்கொண்டனர்.

இந்த நிலையில், போலி நகைகளை அடமானம் வைத்து மோசடி செய்ததாக முகமது சாகுல் ஹமீது மற்றும் தனுநாயகம் ஆகிய இரண்டு பேரையும் குற்றப்பிரிவு போலீசார் கைது செய்தனர். மேலும் இதுகுறித்து மாவட்ட குற்றப் பிரிவு போலீசார் தொடர்ந்து விசாரணை மேற்கொண்டு வருகின்றனர்.