மன்னார்குடி அருகே சாலையில் நெல் மூட்டைகளை வைத்து விவசாயிகள் சாலை மறியல்

திருவாரூர் மாவட்டம், மன்னார்குடியை அடுத்த ஓரத்தூர் ஊராட்சிக்கு உட்பட்ட பகுதியில் பல்லாயிரக்கணக்கான ஏக்கர் விளைநிலங்கள் உள்ளன. மாவட்டத்திலேயே மிகப்பெரிய ஊராட்சி பகுதியாக திகழும் இப்பகுதியில் அரசின் நிரந்தர நேரடி நெல்கொள்முதல் நிலையம் செயல்பட்டு வருகிறது.

கோட்டூர் ஒன்றியத்திற்கு உட்பட்ட பகுதியில் கடந்த சில நாட்களாக சம்பா பருவ நெல் அறுவடைபணிகள் முழுவீச்சில் நடைபெற்று வரும்போதிலும் இப்பகுதியில் உள்ள அரசின் நேரடி நெல்கொள்முதல் நிலையம் திறக்கப்படாமல் இருந்துவருகிறது. இருப்பினும் இது நிரந்தர நெல்கொள்முதல் நிலையமாக இருந்துவருவதால் தாங்கள் விளைவித்த நெல்லை விற்பனை செய்யும் வகையில் இக்கொள்முதல் நிலையத்திற்கு தினசரி விவசாயிகள் நெல்மூட்டைகளை கொண்டுவந்த வண்ணம் உள்ளனர். இதுவரை ஓரத்தூர் கிராமத்தில் நிரந்தர அரசு கொள்முதல் நிலையத்தில் 10,000த்திற்கும் மேற்பட்ட நெல்மூட்டைகள் வந்தபோதிலும் கொள்முதல் நிலையம் திறக்கப்படாத நிலையால் அனைத்து நெல்மூட்டைகளும் மழையிலும், பனியிலும் வீணாகி முளைக்க தொடங்கின.

இதனால் ஆத்திரம் அடைந்த விவசாயிகள் கொள்முதல் நிலையத்தை உடனடியாக திறக்க வலியுறுத்தியும், மாவட்ட நிர்வாகத்தின் அலட்சியபோக்கை கண்டித்தும் திடீரென ஒரத்தூர் பகுதியில் சாலைமறியல் போராட்டத்தில் ஈடுபட்டனர். இதனால் மன்னார்குடி- முத்துப்பேட்டை சாலை மார்க்கத்தில் போக்குவரத்து கடுமையாக பாதிக்கப்பட்டது. சாலைமறியல் போராட்டத்தை அடுத்து நுகர்பொருள் வாணிப கழக அதிகாரிகள் பரவாக்கோட்டை நெல்கொள்முதல் நிலையப்பகுதிக்கு வந்து விவசாயிகளுடன் பேச்சுவார்த்தை நடத்தி 24 மணி நேரத்திற்குள் கொள்முதல் நிலையம் செயல்பட நடவடிக்கை எடுப்பதாக உறுதி அளித்தனர்.