"பள்ளிக்குச் செல்லலாம், கவலைப்பட வேண்டாம்" - முதலமைச்சர் மு.க.ஸ்டாலின்

தமிழ்நாடு முதலமைச்சர் மு.க.ஸ்டாலினுக்கு ஒசூர், டைட்டன் டவுன்ஷிப்பைச் சேர்ந்த ரவிராஜன்- உதயகுமாரி ஆகியோரின் மகள் செல்வி பிரஜ்னா பள்ளிகளைத் திறக்கும்படி கோரிக்கை விடுத்து கடிதம் எழுதியிருந்தார்.

அக்கடிதத்தில் குறிப்பிடப்பட்டிருந்த அவரது தொலைபேசி எண்ணில் இன்று முதலமைச்சர் ஸ்டாலின் தொடர்புகொண்டு பேசினார்.

நவம்பர் 1-ஆம் நாள் பள்ளிகளைத் திறக்க நடவடிக்கை எடுக்கப்பட்டு வருவதாகவும், அப்படித் திறக்கப்படும் போது, பள்ளிக்குச் செல்லலாம்-கவலைப்பட வேண்டாம் என்று அந்த மாணவியிடம் கூறினார். மேலும், ஆசிரியர்கள் கூறுவதைக் கேட்டு தனிமனித இடைவெளியை பின்பற்றுதல், முகக்கவசம்அணிந்துகொள்ளுதல் உள்ளிட்ட கொரோனா தடுப்பு நடவடிக்கைகளை முறையாகப் பின்பற்ற வேண்டும், நன்றாக படிக்க வேண்டும் என்று அறிவுரை கூறி வாழ்த்தினார்.