தாராமங்கலம் வட்டாரத்தில் அக்.1ம் தேதி இளைஞர் திறன் திருவிழா

சேலம் மாவட்டம், தாரமங்கலம் வட்டாரத்தில் வரும் அக்டோபர் 1ம் தேதி, வட்டார அளவிலான இளைஞர் திறன் திருவிழா நடைபெற உள்ளது. இதுகுறித்து மாவட்ட ஆட்சித்தலைவர் செ.கார்மேகம், வெளியிட்டுள்ள அறிக்கையில், சேலம் மாவட்டம், தமிழ்நாடு மாநில ஊரக வாழ்வாதார இயக்கத்தின் (மகளிர் திட்டம்) மூலம் தாரமங்கலம் வட்டாரத்தில் 01.10.2022, சனிக்கிழமை அன்று வட்டார அளவிலான இளைஞர் திறன் திருவிழா நடைபெற உள்ளது. இதில் அரசுத் துறைகளின் மூலம் பல்வேறு பயிற்சிகளுக்கு ஆட்கள் தேர்வு செய்யப்பட உள்ளது.

இம்முகாமானது ஓமலூர் மெயின் ரோடு, தாரமங்கலம் செங்குந்தர் மகாஜன மேல்நிலைப் பள்ளியில் காலை 9 மணி முதல் மாலை 4 மணி வரை நடைபெறும். இம்முகாமில் 18 வயது முதல் 45 வயது வரை உள்ள படித்த படிக்காத, ஆண் பெண் இருபாலரும் கலந்து கொண்டு தங்களுக்கு தேவையான கட்டணமில்லா பயிற்சிகளை தேர்வு செய்து பிரபல தனியார் பயிற்சி நிறுவனங்களில் பயிற்சி பெற்றுக் கொள்ளலாம்.

மேற்படி, பயிற்சி காலத்தில் பயிற்சிக்குத் தேவையான உபகரணங்கள், பயிற்சிக் கையேடு, சீருடை, ஆங்கில அறிவு பயிற்சி மற்றும் இதர மதிப்புக்கூட்டு பயிற்சிகளும் வழங்கப்படுகிறது. இப்பயிற்சியின் நிறைவில் தனியார் நிறுவனங்கள் மூலம் வேலைவாய்ப்பும் ஏற்படுத்தித்தரப்படும்.

எனவே, தாரமங்கலம் மற்றும் அதன் சுற்று வட்டாரப் பகுதிகளில் உள்ள இளைஞர்கள் இந்த இளைஞர் திறன் திருவிழாவில் கலந்து கொண்டு பயன்பெறலாம். மேலும் விவரங்களுக்கு 96298 11700, 96590 31180 மற்றும் 0427 2411552 என்ற எண்க ளில் தொடர்பு கொண்டு பயன்பெறலாம். இவ்வாறு மாவட்ட ஆட்சித்தலைவர் தெரிவித்துள்ளார்.