மேட்டூர் அணையின் நீர்மட்டம் அதிகரிப்பு

காவிரி நீர்ப்பிடிப்பு பகுதிகளில் மழை பெய்து வருவதால் மேட்டூர் அணையின் நீர் மட்டம் உயர்ந்துள்ளது. இதனால் பொதுமக்கள் மகிழ்ச்சியடைந்துள்ளனர்.

மேட்டூர் அணையின் நீர்மட்டம் கடந்த சில வாரங்களாக அதிகரிப்பதும் குறைவதுமாக இருந்து வருகிறது. இதற்கு காரணம் காவிரி நீர்ப்பிடிப்பு பகுதிகளில் பெய்யும் மழைதான். அதிக அளவு மழை இருந்தால் மேட்டூர் அணை கடகடவென நிரம்புவதும், மழை இன்றி இருந்தால் அணையின் நீர்மட்டம் குறைவதுமாக இருக்கிறது.

ஒகேனக்கல் பகுதியில் கடந்த சில நாட்களாக நீர்வரத்து அதிகரித்து வருகிறது. 2 நாட்களாக 1500 கன அடி நீர் வந்துகொண்டிருந்த நிலையில், இப்போது நீர்வரத்து 2 ஆயிரம் கன அடியாக அதிகரித்துள்ளது. இதனால் மேட்டூர் அணைக்கான நீர்வரத்து மிக வேகமாக அதிகரித்துள்ளது. நேற்று 1804 கன அடியாக இருந்த நீர்வரத்து இன்று காலையில் 2267 கன அடியாக உயர்ந்துள்ளது.

அணையிலிருந்து குடிநீர் தேவைக்காக நொடிக்கு 1500 கன அடி வீதம் தண்ணீர் காவிரி ஆற்றில் திறக்கப்பட்டு வருகிறது. அணையின் நீர் மட்டம் இன்று காலை 103.73 கனஅடியாக உயர்ந்துள்ளது.