நல்லேர் பூட்டி விளைநிலத்தை உழுது வழிபட்டு புத்தாண்டை வரவேற்ற விவசாயிகள்

தமிழர் புத்தாண்டான சித்திரை முதல் நாள் நல்லேர் பூட்டி விளை நிலத்தை வழிபட்டால் அந்த ஆண்டு நல்ல மழை பெய்து விவசாயம் செழிக்கும் என்பது விவசாயிகளின் நம்பிக்கையாக உள்ளது.

இந்நிலையில், சித்திரை முதல் நாளான இன்று புதுக்கோட்டை ஆலங்குடி அருகேயுள்ள மாங்கோட்டை, கொத்தமங்கலம், செரியலூர், கீரமங்கலம், வடகாடு உட்பட பல்வேறு கிராமங்களை சேர்ந்த விவசாயிகள் இந்த ஆண்டு நல்ல மழை பொழிய வேண்டி நல்லேரு பூட்டி விளை நிலத்தையும், வானத்தையும் வழிபட்டனர்.

மாங்கோட்டை கிராமத்தில் நடைபெற்ற நல்லேர் பூட்டும் நிகழ்வில் அப்பகுதியை சேர்ந்த விவசாயிகள் மற்றும் பெண்கள் பொதுமக்கள் என அனைவரும் ஒரே இடத்தில் கூடி தேங்காய் பழம் தானியங்கள் மற்றும் பச்சரிசி உள்ளிட்ட பூஜைப் பொருட்களை வைத்து விளைநிலத்தில் கூட்டு வழிபாட்டு பிரார்த்தனைகளிலும் ஈடுபட்டனர்.

அதன் பின்பு வரிசையில் அணிவகுத்து நின்ற டிராக்டர்களுக்கும் பூஜைகள் செய்த பட்ட பின் நல்லேர் பூட்டும் நிகழ்வு தொடங்கியது. இதில் பத்திற்கும் மேற்பட்ட டிராக்டர்களில் விவசாயிகள் சித்திரை முதல்நாள் உழவுப் பணியை உற்சாகத்தோடு தொடங்கினர்.