அமைச்சர் ட்விட்டர் பக்கத்தில் ஹேக்கர்கள் கைவரிசை

சமீபகாலமாகவே அரசியல் பிரமுகர்கள், பிரபலங்களின் சமூக வலைதள பக்கங்கள் ஹேக் செய்யப்பட்டு, தவறான தகவல்கள் பதிவு செய்யப்பட்டு வருகின்றன. அந்த வகையில் தமிழக நகராட்சி நிர்வாகத்துறை அமைச்சர் கே.என்.நேருவின் ட்விட்டர் பக்கம் ஹேக்கர்களால் முடக்கப்பட்டுள்ளது.

தமிழக நகராட்சி நிர்வாகத்துறை அமைச்சர் கே.என்.நேரு ட்விட்டர் பக்கம் நேற்று இரவு ஹேக் செய்யப்பட்டுள்ளது. மேலும் அமைச்சர் கே.என். நேருவின் ட்விட்டர் பக்கம் ஹேக்கர்களால் முடக்கப்பட்டு, நாசா பற்றிய பதிவுகள் பகிரப்பட்டது.

இது தொடர்பாக தனது பேஸ்புக் பக்கத்தில் கருத்து தெரிவித்துள்ள அமைச்சர் கே.என்.நேரு, " எனது ட்விட்டர் பக்கம் தற்போது முடக்கப்பட்டுள்ளது. தொழில்நுட்ப குழு எனது ட்விட்டர் பக்கத்தை மீட்டெடுக்கும் முயற்சியில் ஈடுபட்டு வருகிறது. ட்விட்டர் பக்கம் மீண்டும் மீட்டெடுக்கப்பட்டவுடன் அது குறித்து விரைவில் தெரியப்படுத்துகிறேன்." இவ்வாறு அதில் தெரிவித்துள்ளார்.

அமைச்சர் நேருவின் ட்விட்டர் பக்கத்தை மீட்கும் வகையில், ட்விட்டர் நிறுவனத்திற்கு திமுக ஐடி விங் சார்பில் புகார் அளிக்கப்பட்டு, மீட்கும் நடவடிக்கைகள் தொடர்ந்து வருகிறது.