குத்தாலம் பேரூராட்சி 4-வது வார்டில் போட்டியிடும் திருநங்கை வாக்கு சேகரிப்பு

மயிலாடுதுறை மாவட்டம் குத்தாலம் பேரூராட்சியில் 15 வார்டுகள் உள்ளன. இதில், நகர்ப்புற உள்ளாட்சித் தேர்தலில் 80 பேர் போட்டியிடுகின்றனர். தி.மு.க.வுடன் கூட்டணி உடன்பாடு ஏற்படாத காரணத்தால் மார்க்சிஸ்ட் கம்யூனிஸ்ட் 3 வார்டுகளில் தனித்து போட்டியிடுகின்றது. இதில் 4-வது வார்டில் சினேகா என்ற திருநங்கை போட்டியிடுகின்றார். காவிரி ஆற்றங்கரையில் வசிக்கும் இருளர் இன மக்களின் அடிப்படை உரிமைகளுக்காக போராடிய வகையில் அவர்களது வாக்குகளையும் பொதுமக்களின் வாக்குகளையும் பெற்று வெற்றி பெற்றுவிடும் முனைப்புடன் களமிறங்கியுள்ள திருநங்கை சினேகா, 4-வது வார்டுக்கு உட்பட்ட பகுதிகளில் மார்க்சிஸ்ட் கம்யூனிஸ்ட் கட்சியினருடன் வீடுவீடாகச் சென்று வாக்கு சேகரித்தார். அப்போது, தெருவில் உள்ள குடிநீர் குழாயில் பொதுமக்களுக்கு தண்ணீர் அடித்துத் தந்து வாக்கு சேகரிப்பில் ஈடுபட்டார்.