மயிலாடுதுறையில் ஜேசிபி ஆபரேட்டர் ஓடஓட குத்திக்கொலை - பரபரப்பு

மயிலாடுதுறை மாவட்டம், மேலபட்டமங்கலம் கிராமத்தைச் சேர்ந்தவர் சதீஷ் (36). ஜேசிபி ஆபரேட்டர். இவருக்கு திருமணமாகி, மூன்று குழந்தைகள் உள்ளனர்.சீனிவாசபுரம் பகுதியில், நண்பர்களுடன் பேசிக்கொண்டிருந்தார். அப்போது, இருசக்கர வாகனத்தில் வந்த மர்ம நபர்கள், சதீஷை கத்தியுடன் விரட்டியுள்ளனர்.

தப்பித்து ஓடும்போது அருகிலுள்ள வயல்வெளி பகுதியில், நெஞ்சில் கத்தியால் குத்தி படுகொலை செய்யப்பட்டார். சம்பவ இடத்திற்கு வந்த மயிலாடுதுறை காவல் ஆய்வாளர் செல்வம் தலைமையிலான போலீசார் உடலைக் கைப்பற்றி உடற்கூறு ஆய்வுக்காக மயிலாடுதுறை அரசு மருத்துவமனைக்கு பரிசோதனைக்கு அனுப்பி வைத்து விசாரணை நடத்தினர்.

விசாரணையில், கொலை செய்யப்பட்ட சதீஸின் அண்ணன் வினோத் என்பவர், மயிலாடுதுறையை அடுத்த பண்டாரவாடையைச் சேர்ந்த பழனிவேல் மனைவியுடன் தகாத உறவில் இருந்ததாகவும், இதுதொடர்பாக சில மாதங்களாக இருதரப்பினர் இடையே பிரச்னை இருந்துவந்ததும், இந்த முன்விரோதத்தில், சதீஷிடம் வலியச் சென்று தகராறில் ஈடுபட்டு விரட்டிச் சென்று கத்தியால் குத்தியதும் தெரியவந்தது.

இது தொடர்பாக, மயிலாடுதுறை போலீசார் பழனிவேல் மற்றும் பழனிவேலுவின் மச்சான் மாதவன் ஆகிய இருவரை காவல் நிலையம் கொண்டு சென்று விசாரணை நடத்தி வருகின்றனர். இதனிடையே, குற்றவாளிகளை கைது செய்யக்கோரி உயிரிழந்த சதீஷின் உறவினர்களும், நண்பர்களும் மறியலில் ஈடுபட்டனர்.