சீர்காழியில் மின்சாரம் சேமிப்பு குறித்த விழிப்புணர்வு பேரணி

மயிலாடுதுறை மாவட்டம் சீர்காழியில் தமிழ்நாடு மின் உற்பத்தி மற்றும் பகிர்மான கழகம் சார்பாக மின்சார சேமிப்பு மற்றும் மின் பாதுகாப்பு குறித்த விழிப்புணர்வு பேரணி நடைபெற்றது. புதிய பேருந்து நிலையத்தில் தொடங்கிய பேரணியை சீர்காழி சட்டமன்ற உறுப்பினர் எம்.பன்னீர்செல்வம் கொடியசைத்து துவக்கி வைத்தார். முதல் விழிப்புணர்வு துண்டு பிரசுரத்தையும் பெற்றுக்கொண்டார்.

அதனைத் தொடர்ந்து பேரணி முக்கிய வீதிகள் வழியாக சீர்காழி நகரில் வலம்வந்து புதிய பேருந்து நிலையம் அருகே முடிவடைந்தது. இப்பேரணியில் மின்வாரிய அதிகாரிகள், தொழிலாளர்கள், பணியாளர்கள் உட்பட 200க்கும் மேற்பட்டோர் கலந்து கொண்டனர். மின்சார சேமிப்பு குறித்த விழிப்புணர்வு வாசகங்கள் கொண்ட பதாகைகளை கையில் ஏந்தியும் விழிப்புணர்வு துண்டு பிரசுரங்களை பொதுமக்களிடம் வழங்கியும் மின்சார சிக்கனம் குறித்து விழிப்புணர்வு ஏற்படுத்தினர்.