மயிலாடுதுறையில் கோபாலகிருஷ்ண பாரதியின் 34வது ஆண்டு இசை விழா நிறைவு

மயிலாடுதுறை ஆனந்ததாண்டவபுரத்தில் பிறந்தவரான கோபாலகிருஷ்ண பாரதி சிவனை மட்டுமே பாடியவர். பன்மொழி புலவர்களுடன் தொடர்பு கொண்டு, அந்தந்த மொழி இசையையும் கற்ற இவர், மும்மூர்த்திகளில் ஒருவரான தியாகராஜரை சந்திக்க திருவையாறு சென்ற இடத்தில் 'சபாபதிக்கு வேறு தெய்வம்" என்ற பாடலை இயற்றியுள்ளார். இவர் 1896ம் ஆண்டு தமது 86வது வயதில் சிவராத்திரியன்று சிவபதம் எய்தினார். இவரது நினைவை போற்றும் வகையில் மயிலாடுதுறையில் வள்ளலார் கோயில் எனப்படும் மேதா தட்சிணாமூர்த்தி கோயிலில் நடந்து வந்த 3 நாள் இசை விழா நிறைவடைந்தது. நிறைவு நாளான இன்று நடந்த நிகழ்ச்சியில், பிரபல கர்நாடக இசை பாடகி சௌம்யாவின் இசை ஆராதனை நடந்தது. இதில், 'சபாபதிக்கு வேறு தெய்வம்" எனத் தொடங்கும் கீர்த்தனை உள்ளிட்ட கோபாலகிருஷ்ண பாரதி இயற்றிய பல்வேறு பாடல்களை சௌம்யா மனமுருக பாடினார். மேலும், திருமெய்ஞானம் ராமநாதன், பாண்டமங்கலம் யுவராஜ் குழுவினரின் நாதஸ்வரம், ரித்விக் ராஜாவின் இன்னிசை பாடல் நிகழ்ச்சி ஆகியனவும் நடைபெற்றது. இதில், ஏராளமான இசை ரசிகர்கள் கலந்துகொண்டு இன்னிசையை கேட்டு ரசித்தனர்.