முதல்வர் மாநில இளைஞர் விருது- விண்ணப்பிக்க அழைப்பு

Karur News,Karur News Today- சமுதாய வளர்ச்சிக்கு சேவையாற்றும் இளைஞர்களது பணியை அங்கீகரிக்கும் வகையில் முதலமைச்சர் மாநில இளைஞர் விருது வழங்கப்படுகிறது.

இதுகுறித்து, கரூர் மாவட்ட கலெக்டர் பிரபுசங்கர் வெளியிட்டுள்ள செய்திக்குறிப்பு

ஒவ்வொரு ஆண்டும், ஆகஸ்ட் 15ம் தேதி சுதந்திர தினத்தன்று 15 வயது முதல் 35 வயது வரை உள்ள 3 ஆண்கள் மற்றும் 3 பெண்களுக்கு, முதல்வர் விருது வழங்கப்பட்டு வருகிறது. இந்த விருது ரூ.ஒரு லட்சம் ரொக்கம், பாராட்டு பத்திரம் மற்றும் பதக்கம் ஆகியவைகளை உள்ளடக்கியதாகும்.

2023-ம் ஆண்டிற்கான முதலமைச்சர் மாநில இளைஞர் விருது வருகிற 15.8.2023 அன்று நடைபெறும் சுதந்திரதின விழாவில் வழங்கப்பட உள்ளது. இவ்விருதுக்கு 16 வயது முதல் 35 வயது வரையுள்ள ஆண், பெண் ஆகியோர் விண்ணப்பிக்கலாம்.1.4.2022 அன்று 15 வயது நிரம்பியவராகவும், மார்ச் 31.3.2023 அன்று 35 வயதுக்குள்ளாகவும் இருக்க வேண்டும். கடந்த நிதியாண்டில் (2022-23) அதாவது 1.4.2022 முதல் 31.3.2023 வரை மேற்கொள்ளப்பட்ட சேவைகள் மட்டுமே கருத்தில் கொள்ளப்படும்.

விருதிற்கு விண்ணப்பிக்கும் முன்பு குறைந்தபட்சம் 5 ஆண்டுகள் தமிழகத்தில் குடியிருந்தவராக இருக்க வேண்டும். (அதற்கான சான்று இணைக்கப்பட வேண்டும்). விண்ணப்பதாரர்கள் சமுதாய நலனுக்காக தன்னார்வத்துடன் தொண்டாற்றிருக்க வேண்டும். அவ்வாறு அவர்கள் செய்த தொண்டு கண்டறியப்பட கூடியதாகவும், அளவிட கூடியதாகவும் இருக்க வேண்டும்.

மத்திய, மாநில அரசுகள், பொதுத்துறை நிறுவனங்கள், பல்கலைக்கழகங்கள், கல்லூரிகள் மற்றும் பள்ளிகளில் பணியாற்றுபவர்கள் இவ்விருதிற்கு விண்ணப்பிக்க இயலாது. விண்ணப்பதாரருக்கு உள்ளூர் மக்களிடம் உள்ள செல்வாக்கு விருதிற்கான பரிசீலனையில் கணக்கில் கொள்ளப்படும். இணையதளம் மூலம் விண்ணப்பிக்க கடைசி நாள் வருகிற 31-ம் தேதி மாலை 4 மணி ஆகும்.

எனவே, இந்த நிதியாண்டிற்கு கரூர் மாவட்டத்தில் உள்ள தகுதியுள்ள நபர்கள் www.sdat.tn.gov.in விண்ணப்பித்து பயன்பெறலாம். மேலும், விவரங்களுக்கு கரூர் மாவட்ட விளையாட்டு மற்றும் இளைஞர் நலன் அலுவலர் தொடர்பு கொள்ளலாம் என, கலெக்டர் பிரபுசங்கர் தெரிவித்துள்ளார்.

எனவே, இந்த நிபந்தனைகளுக்கு உட்பட்ட தகுதியான நபர்கள், முதல்வர் விருதுக்கு விண்ணப்பிக்க அறிவுறுத்தப்பட்டுள்ளது.