பைக் மோதி பல அடி தூரம் இழுத்துச் சென்ற மாணவி: சிசிடிவி காட்சியால் பரபரப்பு

கன்னியாகுமரி மாவட்டம் இரணியல் அருகே நெய்யூர் பகுதியை சேர்ந்தவர் அந்தோணி அமல்ராஜ், இவரது மகள் 15-வயதான அனுஷியா. இவர் அப்பகுதியில் உள்ள தனியார் பள்ளியில் 10-ம் வகுப்பு படித்து வருகிறார். இதனிடையே பள்ளிக்கு சென்ற அனுஷியா மாலை தனது தோழிகளுடன் நெய்யூர் சாலையில் நடந்து வந்து கொண்டிருந்தார்.

அப்போது எதிரே இளைஞர் ஒருவர் அதிவேகமாக ஓட்டி வந்த இருசக்கர வாகனம் மாணவிகள் மீது மோதிய நிலையில் அனுஷியா பைக்கில் சிக்கி பல அடி தூரம் சாலையில் இழுத்து சென்று தூக்கி வீசப்பட்டார். இந்த விபத்தில் அவருக்கு தலை மற்றும் கால் பகுதிகளில் படுகாயம் ஏற்பட்டது. இதனையடுத்து அக்கம்பக்கத்தினர் அவரை மீட்டு சிகிச்சைக்காக மருத்துவமனைக்கு அனுப்பி வைத்தனர்.

இந்நிலையில் பைக்கில் வந்த இளைஞர் தப்பியோடிய நிலையில் புகாரின் அடிப்படையில் இரணியல் போலீசார் வழக்கு பதிவு செய்து தப்பியோடிய இளைஞரை தேடி வருகின்றனர். இதனிடையே பள்ளி மாணவி மீது பைக் மோதி தூக்கி வீசப்படும் பதைபதைக்கும் சிசிடிவி காட்சிகள் தற்போது வெளியாகி பரபரப்பை ஏற்படுத்தியுள்ளது.