மெடிக்கல் உரிமையாளர் வீட்டில் பணம் திருட்டு- 3 பேர் கைது

ஆரல்வாய்மொழி அருகே மெடிக்கல் உரிமையாளர் வீட்டில் பணம் திருடியதாக இளம்பெண் உட்பட 3 பேர் கைது செய்யப்பட்டனர்.

கன்னியாகுமரி மாவட்டம் ஆரல்வாய்மொழி அருகே தாழக்குடி பகுதியை சேர்ந்தவர் சபரிகிரிசன்(43). மெடிக்கல் நடத்தி வரும் இவர் வயதான தனது பெற்றோரை கவனித்துக் கொள்ள குருந்தன் கோடு பகுதியை சேர்ந்த ஜெயலெட்சுமி(25) என்ற பெண்ணை வேலைக்கு அமர்த்தினார்.இந்நிலையில் சபரிகிரிசன் வீட்டில் இருந்த பீரோவை திறந்து பார்த்த போது அதில் இருந்த சுமார் 17 பவுன் நகை மற்றும் ரூபாய் 15 ஆயிரம் ஆகியவற்றை காணவில்லை என்பதை கண்டு அதிர்ச்சி அடைந்தார். உடனே இதுகுறித்து ஆரல்வாய்மொழி போலீசில் புகார் அளித்தார்.

புகாரை விசாரித்த சப்இன்ஸ்பெக்டர் சார்லஸ் தலைமையிலான போலீசார் தீவிர விசாரணை நடத்தினர். விசாரணையில் நகையை திருடியது சபரிகிரிசன் வீட்டில் வேலை செய்யும் ஜெயலட்சுமி என்பதும், அதற்கு உடந்தையாக அவரது தாய் பார்வதியும், அண்ணன் சிவகுமார்(27) இருந்தது தெரிய வந்தது.இதனை தொடர்ந்து 3 பேர் மீதும் வழக்கு பதிவு செய்து, அவர்களை கைது செய்த போலீசார் அவர்களை சிறையில் அடைத்தனர். போலீசார் விசாரணையில் ஜெயலட்சுமி மீதும் தாய் பார்வதி மீதும் ஏற்கனவே திருவட்டார் மற்றும் இரணியல் காவல் நிலையங்களில் திருட்டு வழக்குகள் உள்ளது என்பது குறிப்பிடத்தக்கது.