பறவை காய்ச்சல் - குமரியில் தடுப்பு பணிகள் தீவிரம்

பறவை காய்ச்சல் தீவிரமாக பரவுவதால் கன்னியாகுமரி மாவட்டத்தில் தடுப்பு பணிகள் தீவிரம் அடைந்துள்ளது.

கேரளாவில் ஒவ்வொரு ஆண்டும் ஜனவரி, பிப்ரவரி மாதங்களில் பறவை காய்ச்சல் நோய் பரவுவது வழக்கம். இதன் காரணமாக பல ஆயிரக்கணக்கான கோழிகளை ‌கேரள சுகாதாரத்துறையினர் அழித்து நோய் பரவல் அதிகரிக்காத வண்ணம் தடுத்து வருகின்றனர்.இந்நிலையில் இந்த ஆண்டும் கேரளாவின் ஆலப்புழா மற்றும் கோட்டயம் ஆகிய மாவட்டங்களில் உள்ள வளர்ப்பு பறவைகளான வாத்து உட்பட அனைத்து விதமான பறவைகள் கடந்த ஒரு சில வாரங்களாக நோய் வாய்ப்பட்டு இறந்து வருகின்றன.

இதனையடுத்து கேரள கால்நடைத்துறை அதிகாரிகள் மற்றும் சுகாதாரத்துறையினர் பறவைகளின் இறப்புக்கு காரணம் குறித்து ஆய்வு நடத்தினர்.இதில் இந்த பறவைகளுக்கு பறவை காய்ச்சல் நோய் தொற்று ஏற்பட்டு இருப்பது உறுதி செய்யப்பட்டது. இதனையடுத்து கேரள அரசு பாதிக்கப்பட்ட சுமார் 50 ஆயிரத்திற்கும் மேற்பட்ட பறவைகளை அழிக்க உத்தரவிட்டது.

இந்நிலையில் இந்த நோய் தொற்று குமரி மாவட்டத்தில் பரவாமல் தடுக்க தமிழக கேரள எல்லை பகுதியான களியக்காவிளை, ஊரம்பு பகுதியில் கால்நடைத்துறையினர் முகாம் அமைத்து கேரளாவில் இருந்து வரும் வாகனங்களுக்கு கிருமி நாசினி தெளித்து முன்னெச்சரிக்கை ஏற்பாடுகளை செய்து வருகின்றனர். மேலும் கேரளாவில் இருந்து கோழிகள் மற்றும் கோழித்தீவனங்கள் ஏற்றி வரும் வாகனங்களை திருப்பி அனுப்பி வருகின்றனர்.இதனிடையே கன்னியாகுமரி மாவட்டத்தில் இதுவரை பறவை காய்ச்சல் பாதிப்பு இல்லை என மாவட்ட ஆட்சியர் அறிவித்து உள்ளார்.