புதுக்கடை, குளச்சல் பகுதிகளில் மண்எண்ணெய் கடத்தல் தடுப்பு!

கன்னியாகுமரி மாவட்டம், புதுக்கடை மற்றும் குளச்சல் பகுதிகளில் மண்எண்ணெய் கடத்தல் தடுப்பு நடவடிக்கைகள் மேற்கொள்ளப்பட்டன.

புதுக்கடை பகுதி காவல்துறையினர் பார்த்திபபுரம் பகுதியில் நேற்று முன்தினம் இரவு வாகன சோதனையில் ஈடுபட்டுக் கொண்டிருந்தனர். அப்போது, அந்த வழியாக ஆட்டோ ஒன்று மிக வேகமாக வந்துகொண்டிருந்தது. வேகமாக வந்த ஆட்டோவை நிறுத்துமாறு காவலர்கள் சொன்னதும், அந்த டிரைவர் ஆட்டோவை நிறுத்திவிட்டு தப்பி குதித்து ஓடி விட்டதாக கூறப்படுகிறது.

இதனால் ஆட்டோவில் கடத்தல் பொருள் இருக்கலாம் என காவல்துறையினர் சந்தேகமடைந்தனர். பின் ஆட்டோவில் சோதனை நடத்திய காவலர்கள், அப்போது, 35 லிட்டர் கொள்ளளவு கொண்ட 9 பிளாஸ்டிக் கேன்களில் 300 லிட்டர் மானிய விலை மண்எண்ணெய் இருப்பதை கண்டுபிடித்தனர்.

விசாரணையில், மண்எண்ணெயை கேரளாவுக்கு கடத்திச் சென்றுகொண்டிருந்தது தெரியவந்தது. இதனையடுத்து மண் எண்ணெயை காவல்துறையினர் பறிமுதல் செய்து, கிள்ளியூர் வட்ட வழங்கல் அலுவலக அதிகாரிகளுக்கு தகவல் தெரிவித்தனர். பின்னர் வழக்குப் பதிவு செய்து அதனை வட்ட வழங்கல் அலுவலகத்தில் ஒப்படைத்தனர்.

இதே போல இன்னொரு சம்பவமும் நடைபெற்றுள்ளது.

மாவட்ட உணவு பொருள் கடத்தல் தடுப்பு பிரிவு சப்-இன்ஸ்பெக்டர் பொன் குணசேகரன் தலைமையிலான காவல்துறையினர் மாலை நேரங்களில் அவர்கள் ஜூரி செக்சனுக்கு உட்பட்ட பகுதிகளில் பரிசோதனையில் ஈடுபடுவது வழக்கம். அதைப் போல நேற்று குளச்சல் பகுதியில் தீவிர வாகன சோதனையில் ஈடுபட்டுக் கொண்டிருந்தனர்.

இந்த சமயத்தில், அல்போன்சா காலனியில் உள்ள பழைய உப்பளம் அருகில் படகுகளுக்கு அரசு மானியத்தில் வழங்கும் வெள்ளை மண் எண்ணெய் பதுக்கி வைக்கப்பட்டு இருப்பதாக காவல்துறையினருக்கு ரகசிய தகவல் கிடைத்தது.

காவல்துறையினர் அங்கு விரைந்து சென்று சோதனை செய்தனர். அப்போது, 22 கேனில் மொத்தம் 660 லிட்டர் மண்எண்ணெய் இருந்ததைக் கண்டுபிடித்தனர். இந்த மண் எண்ணெய்யை கேரளாவுக்கு கடத்தி சென்று கூடுதல் விலைக்கு விற்பதற்காக அதே பகுதியை சேர்ந்த அமல்ராஜ், ரீட் மேரி ஆகியோர் பதுக்கி வைத்திருந்தது கண்டுபிடிக்கப்பட்டது. அந்த நேரத்தில் போலீஸ் தேடுவதை அறிந்த 2 பேரும் தலைமறைவாகி விட்டனர். இதனால் அவர்களை காவல்துறையினர் தேடி வருகிறார்கள்.

இந்த இரு சம்பவங்களிலும், மானியத்தில் வழங்கப்படும் மண்எண்ணெய்யை கேரளாவுக்கு கடத்தி செல்ல முயன்றவர்கள் கைது செய்யப்பட்டனர். மேலும், கடத்தப்பட்ட மண்எண்ணெய் பறிமுதல் செய்யப்பட்டது.