காவிரியில் அடுத்த 15 நாட்கள் தினமும் 5 ஆயிரம் கனஅடி நீர் திறக்க கர்நாடகாவுக்கு பரிந்துரை

தமிழகத்திற்கு அடுத்த 15 நாட்களுக்கு தினமும் வினாடிக்கு 5,000 கன அடி வீதம் தண்ணீர் திறந்துவிட கர்நாடகாவுக்கு காவிரி நீர் ஒழுங்காற்று குழு (சிடபிள்யூஆர்சி) செவ்வாய்க்கிழமை உத்தரவிட்டது. ஆகஸ்ட் 28 அன்று இதேபோன்ற உத்தரவை பிறப்பித்தது

காவிரியில் தண்ணீர் திறந்து விடுவது தொடர்பாக கர்நாடக மாநிலம் மற்றும் தமிழ்நாடு இடையே பிரச்சினை இருந்து வருகிறது. ஆகஸ்ட், செப்டம்பர் மாதத்திற்கான நீரை திறந்து விட கர்நாடக அரசுக்கு உத்தரவிட வேண்டும் என தமிழக அரசு தொடர்ந்து வலியுறுத்தி வருகிறது. அதேவேளையில், வழக்கமான நடைமுறையின்படி தண்ணீர் திறந்துவிட உத்தரவு பிறப்பிக்கக் கூடாது என்றும் கர்நாடக அணைகளில் தண்ணீர் மோதுமான அளவில் இல்லை என்றும் கர்நாடக அரசு தெரிவித்து வருகிறது.

இந்த நிலையில் டெல்லியில் காவிரி நதிநீர் ஒழுங்காற்று குழு இன்று (செவ்வாய்க்கிழமை) கூடியது. இதில் தமிழக அரசு சார்பில் கர்நாடகத்தில் உள்ள காவிரி நீர்ப்பிடிப்பு பகுதிகளில் பெய்து வரும் மழையின் அளவு, அங்குள்ள அணைகளில் உள்ள தண்ணீரின் அளவு உள்ளிட்ட விவரங்கள் தெரிவிக்கப்பட்டன. இவற்றை ஆய்வு செய்த பிறகு, அடுத்த 15 நாட்கள் தமிழகத்திற்கு தினமும் 5 ஆயிரம் கனஅடி நீர் திறக்க கர்நாடக அரசுக்கு காவிரி ஒழுங்காற்று குழு பரிந்துரை செய்துள்ளது.

கடந்த ஆகஸ்ட் 28-ம் தேதி கர்நாடகா எதிர்ப்புக்கு மத்தியில், தமிழகத்துக்கு 15 நாட்களுக்கு 5,000 கன அடி தண்ணீர் திறந்துவிட சிடபிள்யூஆர்சி உத்தரவிட்டது. காவிரி நீர் மேலாண்மை ஆணையம் (CWMA) CWRC இன் உத்தரவை உறுதி செய்தது.

கர்நாடக அரசு உடனடியாக தண்ணீர் திறப்பதை நிறுத்தக் கோரி ஸ்ரீரங்கப்பட்டினத்தில் விவசாயிகள் சங்கத்தினர் பல்வேறு போராட்டங்களை நடத்தினர்.

இதற்கிடையில், 2018-ம் ஆண்டு உத்தரவின்படி காவிரியில் தண்ணீர் திறந்துவிட கர்நாடகாவுக்கு உத்தரவிடக் கோரி தமிழகம் உச்ச நீதிமன்றத்தை அணுகியது.

மழை பற்றாக்குறையால் அண்டை மாநிலத்திற்கு தண்ணீர் திறந்து விட முடியாது என்று கர்நாடகா உச்ச நீதிமன்றத்தில் பிரமாணப் பத்திரம் தாக்கல் செய்துள்ளது.