2019 ம் ஆண்டு -சென்னை சென்ட்ரலுக்கு MGR பெயர் சூட்டப்பட்ட நாள் இன்று
8 ஏப்ரல் 2019ம் ஆண்டு - சென்னை சென்ட்ரலுக்கு MGR பெயர் சூட்டப்பட்ட நாள் இன்று.
தலைநகரான சென்னை என்றாலே, முதலில் நினைவுக்கு வரும் இடங்களில் ஒன்று சென்னை சென்ட்ரல் ரயில் நிலையம், ஆங்கிலேயர் ஆட்சிக் காலத்தில் இருந்து இன்றளவும் சிறப்பாக செயல்பட்டு வரும் இந்த ரயில் நிலையத்தில் இருந்து பல ஆயிரக்கணக்கானோர் வெளி மாவட்டங்கள் மற்றும் வெளிமாநிலங்களுக்கு சென்று வருகின்றனர்.
இந்நிலையில், கடந்த 2018 ம் ஆண்டு செப்டம்பர் மாதம் 9-ம் தேதி நடைபெற்ற தமிழக அமைச்சரவைக் கூட்டத்தில் சென்னை ரயில் நிலையத்தின் பெயரை டாக்டர் புரட்சித்தலைவர் எம்.ஜி.ராமச்சந்திரன் சென்ட்ரல் ரயில் நிலையம் என்று மாற்ற வேண்டும் என்று மத்திய அரசுக்கு பரிந்துரை செய்ய ஒப்புதல் அளிக்கப்பட்டது.
இந்த தீர்மானம் பிரதமர் நரேந்திர மோடிக்கு 2018 ம் ஆண்டு செப்டம்பர் 12-ம் தேதி அனுப்பி வைக்கப்பட்டது. மத்திய சென்னை எம்.பி. எஸ்.ஆர் விஜயகுமாரும் 377-வது சட்டவிதியின்படி, சென்னை சென்ட்ரல் ரயில் நிலையத்துக்கு எம்.ஜி.ஆரின் பெயரை சூட்டும்படி கோரிக்கை விடுத்திருந்தார்.
இந்நிலையில், தேர்தல் பிரசார பொதுக்கூட்டத்தில் கலந்து கொள்ள தமிழகத்துக்கு வருகை தந்த பிரதமர் நரேந்திர மோடி, வண்டலூர் அருகே நடைபெற்ற பொதுக் கூட்டத்தில் பல்வேறு திட்டங்களை நாட்டு மக்களுக்கு அர்ப்பணித்தார்.அப்போது கூட்டத்தில் பேசிய மோடி, சென்னை சென்ட்ரல் ரயில் நிலையத்துக்கு எம்ஜிஆர் பெயர் சூட்டப்படும் என்று உறுதியளித்தார்.
தொடர்ந்து சென்ட்ரல் ரயில் நிலையத்தின் பெயரை புரட்சித் தலைவர் டாக்டர் எம்.ஜி.ராமச்சந்திரன் மத்திய ரயில் நிலையம் என்று பெயர் மாற்றம் செய்வதற்கான அறிவிக்கையை அரசிதழில் தலைமைச் செயலாளர் கிரிஜா வைத்தியநாதன் வெளியிட்டார். அதில், பெயர் மாற்றம் செய்வதற்கு தடையில்லை என்று மத்திய உள்துறை அமைச்சகம், கடிதம் அனுப்பியுள்ளதாகவும், அறிவிக்கை வெளியான நாளிலிருந்து பெயர் மாற்றம் அமலுக்கு வருவதாகவும் தெரிவிக்கப்பட்டுள்ளது.
இதையடுத்து 2019 ம் ஆண்டு ஏப்ரல் 8 ம் தேதி சென்னை சென்ட்ரல் ரயில் நிலையத்திற்கு 'புரட்சித் தலைவர் டாக்டர்.எம்.ஜி.இராமச்சந்திரன் மத்திய ரயில் நிலையம்' என்று புதிய பெயர் பலகை வைக்கப்பட்டது. இதே போல பயணச்சீட்டு, ஆன்லைன் முன்பதிவு உள்ளிட்ட அனைத்திலும் ஓரிரு நாட்களில் பெயர் மாற்றம் செய்யப்பட்டது
