ஆர்.டி.ஓ. அலுவலகத்தில் ஆர்.சி.புத்தகம் மாயம்: 5 பேர் பணியிடை நீக்கம்

RC Book Missing -சென்னை தாம்பரம் அடுத்த கிஷ்கிந்தா சாலையில் செயல்பட்டு வரும் தாம்பரம் வட்டார போக்குவரத்து அலுவலகத்தில் இருந்து 37 வாகன ஆர்.சி.புத்தகம் மாயமாகியுள்ளது. இது குறித்து யாருக்கும் தகவல் தெரிவிக்காமல் மறைக்கப்பட்டதாக கூறப்படுகிறது.இது குறித்தான தகவல் சமூக வலைதளத்தில் பரவி, போக்குவரத்து ஆணையரிடம் புகாராக சென்றுள்ளது.

உடனடியாக போக்குவரத்து ஆணையர் தலைமையில் அதிகாரிகள் ஆர்.டி.ஓ. விசாரணை நடத்தியதில் ஆர்.சி.புத்தகம் மாயமானது உண்மை என தெரியவந்தது. இதனையடுத்து ஆர்.டி.ஓ.அலுவலகத்தில் பணிபுரியும் கண்காணிப்பாளர்கள் பாலாஜி, லட்சுமி காந்த் காளத்தி, ஆர்.டி.ஓ. உதவியாளர், இளநிலை உதவியாளர் இருவர் என 5 பேர் பணியிடை நீக்கம் செய்யப்பட்டுள்ளனர்.

மேலும் இது தொடர்பாக வட்டார போக்குவரத்து அலுவலர் முக்கண்ணன் தாம்பரம் காவல் நிலையத்தில் காண்காணிப்பாளர்கள் பாலாஜி, காளத்தி, கிளர்க் தாமோதரன், எழுத்தர் சாந்தி, மற்றும் வெளிநபர் ரமேஷ் ஆகியோர் மீது நடவடிக்கை எடுக்கவும் 37 ஆர்.சி.புத்தகத்தை கண்டு பிடித்து தரும்படியும் புகார் அளித்துள்ளார். போலீசார் புகார் தொடர்பாக விசாரித்து வருகின்றனர்.

இச்சம்பவம் குறித்து வட்டார போக்குவரத்து அலுவலரிடம் தொடர்பு கொண்டு கேட்ட போது ஆர்.சி.புத்தகம் காணாமல் போனதை என்னிடம் தெரிவிக்காமல் மறைத்து விட்டனர். அது அதிகாரிகளுக்கு தெரிந்ததும் நடவடிக்கை எடுத்து விட்டனர். ஆர்.சி.புத்தகம் தொலைந்து போன 37 பேருக்கும் புதிதாக ஆர்.சி.புத்தகம் வழங்கப்பட்டது. அதனால் எவ்வித பிரச்சினையும் இல்லை, பழைய ஆர்.சி.புத்தகம் காலாவதியாகிவிடும் என தெரிவித்தார்.

அடுத்த முக்கியமான செய்திகளை தெரிந்துகொள்ள: Click Here-1, Click Here-2