மேடவாக்கத்தில் கால்வாய் பணியால் குடிநீர் குழாய் சேதம்

மேடவாக்கம் பிரதான சாலையில் மழைநீர் வடிகால் கால்வாய் பணிகள் நடைபெற்று வருகிறது.

இந்த பணியின்போது மேடவாக்கம் ஊராட்சி 1-வது வார்டுக்கு உட்பட்ட பெரியார் நகரில் உள்ள ராமதாஸ் தெரு ராமதாஸ் குறுக்கு தெரு, சோழன் தெரு, பாண்டியன் தெரு ஆகிய இடங்களுக்கு செல்லும் குடிநீர் குழாய்கள் முற்றிலும் சேதம் அடைந்தன. 8 மாதத்திற்கு மேல் ஆகியும் குடிநீர் குழாய் சீரமைக்கப்படவில்லை. இதனால் அப்பகுதிகளில் வசிக்கும் 500-க்கும் மேற்பட்ட குடும்பத்தினர் குடிநீர் இல்லாமல் அவதிப்பட்டு வருகின்றனர்.

இது குறித்து அப்பகுதி மக்கள் சம்பந்தப்பட்ட அதிகாரிகளிடம் புகார் தெரிவித்தும் நடவடிக்கை எடுக்கவில்லை. இந்த நிலையில் 1-வது வார்டு உறுப்பினர் அம்மு கிருஷ்ணமூர்த்தி ஏற்பாட்டில் லாரிகள் மூலம் அப்பகுதி மக்களுக்கு குடிதண்ணீர் சப்ளை செய்யப்பட்டு வருகிறது.

சேதம் அடைந்த குடிநீர் குழாய்களை உடனடியாக சரிசெய்ய வேண்டும் என்று பொதுமக்கள் கோரிக்கை விடுத்து உள்ளனர்.