இளையராஜா பாட்டு பாடினால் பிரியாணி விருந்து.. வைரலாகும் செய்தி
செங்கல்பட்டு மாவட்டம், மதுராந்தகம் அடுத்த சோத்துபாக்கத்தில் சர்வதேச வேட்டித் தினமான நேற்று ஆம்பூர் பிரியாணி கடை ஒன்று, பிரியாணி பிரியர்களுக்காக வெளியிட்ட அசத்தல் அறிவிப்பு ஒன்றின் போஸ்டர் அதிகமாக வைரலாகி வருகிறது.
பொதுவாக, விருப்பமான உணவு என்றாலே நமது ஊர்க்கார்கள், அதிகம் சொல்லும் பேராக பிரியாணி தான் நிச்சயம் இருக்கும். அந்த வகையில், பிரியாணி உணவு, மக்கள் மத்தியில் அதிகம் வரவேற்பைப் பெற்ற ஒன்றாக உள்ளது. குழந்தைகள் மற்றும் பெரியவர்கள் வரை பலரும் விரும்பி உண்பதை வாடிக்கையாக கொண்டுள்ளனர்.
இந்நிலையில், செங்கல்பட்டு மாவட்டம், சோத்துப்பாக்கம் பகுதியில் அமைந்துள்ள ஆம்பூர் பிரியாணி கடை ஒன்று, சர்வதேச வேட்டித் தினத்தை முன்னிட்டு அசத்தல் அறிவிப்பு ஒன்றை வெளியிட்டுள்ளது. அதே போல, இளையராஜா ரசிகர்கள் மத்தியிலும் இந்த அறிவிப்பு அதிகம் வைரலாகி வருகிறது.
அதாவது, இளையராஜா இசையமைத்த எந்த ஒரு பாடலைப் பாடினாலும், அந்த நபர்களுக்கு பிரியாணி விருந்து அளிக்கப்படும் என அந்த உணவகம் வெளியிட்ட போஸ்டரில் குறிப்பிடப்பட்டுள்ளது. அதே போல, பக்கெட் பிரியாணி வாங்குபவர்களுக்கும் ஒரு வேட்டி இலவசமாக வழங்கப்படும் என அறிவித்திருந்தது.
இது தொடர்பான போஸ்டர்கள், தற்போது அதிகம் வைரலாகி வருகிறது. இதைத்தொடர்ந்து அப்பகுதியைச் சேர்ந்த பிரியாணி பிரியர்கள் மற்றும் இளையராஜா ரசிகர்கள் அந்த உணவகத்தில் உணவை வாங்கி சாப்பிட்டனர். இதுகுறித்து வேட்டி ரசிகர்கள் சர்வதேச வேட்டி தினத்தின் சிறப்பை பறைசாற்ற, வினோதமான தள்ளுபடி மற்றும் வேட்டி இலவசம் என அறிவிப்பை முன்னெடுத்த உணவக நிர்வாகத்தை பலரும் பாராட்டினர்.
