லாரி - கார் மோதி விபத்து- 5 பேர் பலி
செங்கல்பட்டு அருகே திருச்சி சென்னை தேசிய நெடுஞ்சாலையில் நின்று கொண்டிருந்த லாரி மீது கார் மோதி ஏற்பட்ட பயங்கர விபத்தில் ஒரே குடும்பத்தைச் சேர்ந்த 5 பேர் பரிதாபமாக உடல் நசுங்கி சம்பவ இடத்திலேயே உயிரிழந்தனர்.
திருச்சி-சென்னை புறவழிச்சாலையான படாளம் அத்திமனம் என்ற இடத்தில் லாரி ஒன்று சாலையோரமாக நின்று கொண்டிருந்தது. அப்போது அதிவேகமாக வந்த கார் திடீரென நின்று கொண்டிருந்த லாரி மீது பலமாக மோதி விபத்துக்குள்ளானது. கண்ணிமைக்கும் நேரத்தில் நடைபெற்ற இந்த கோர விபத்தில் ஒரே குடும்பத்தை சேர்ந்த சுப்பிரமணி (67) மற்றும் அவரது மனைவி, இவர்களது மகள் மகாலட்சுமி(40) பேத்தி சாந்தி(18) மற்றும் ஓட்டுநர் கந்தன்(45) ஆகிய 5 பேர் சம்பவ இடத்திலேயே உடல் நசுங்கி உயிரிழந்தனர்.
இது குறித்து அறிந்த படாளம் போலீசார் சம்பவ இடத்துக்கு சென்று இறந்தவர்களின் உடல்களை மீட்டு உடற்கூறு ஆய்வுக்காக செங்கல்பட்டு அரசு மருத்துவமனைக்கு அனுப்பி வைத்தனர். காரில் உயிரிழந்தவர்கள், சென்னை பூந்தமல்லியை அடுத்த கரையாஞ்சாவடி பகுதியை சேர்ந்தவர்கள் என்பதும், இவர்கள் நேற்று சமயபுரம் கோயிலுக்குச் சென்று விட்டு திரும்பிய போது அதிகாலை விபத்து ஏற்பட்டதாகவும் முதல்கட்ட விசாரணையில் தெரிய வந்துள்ளது. போலீசார் வழக்கு பதிவு செய்து விசாரணை மேற்கொண்டுள்ளனர்.
