தமிழ் புத்தாண்டு- கங்கைகொண்ட சோழபுரத்தில் சிறப்பு வழிபாடு

அரியலூர் மாவட்டம் ஜெயங்கொண்டம் அருகே கங்கைகொண்ட சோழபுரத்தில் தமிழ் புத்தாண்டையொட்டி சிறப்பு வழிபாடு நடைபெற்றது.

அரியலூர் மாவட்டம் ஜெயங்கொண்டம் அருகே மாமன்னன் ராஜேந்திர சோழனால் கட்டப்பட்டு, உலக பிரசித்தி பெற்ற கங்கைகொண்ட சோழபுரம் பிரகதீஸ்வரர் கோவிலில் ஒவ்வொரு ஆண்டும் தமிழ் புத்தாண்டு அன்று சிறப்பு வழிபாடுகள் நடைபெறும். அன்றைய தினம் பக்தர்கள் கூட்டம் அலைமோதி கோவிலே விழாக்கோலம் பூண்டிருக்கும்.இந்தாண்டு தற்போது கொரோனா வைரஸ் 2-ம் அலை தீவிரமாக வீசி வருவதால், தமிழக அரசின் சார்பில், பல்வேறு கட்டுப்பாடுகள் விதிமுறைகள் அமல் படுத்தப்பட்டு முன்னெச்சரிக்கை நடவடிக்கை பணிகள் முடுக்கி விடப்பட்டுள்ளன.

இந்நிலையில் தமிழ் புத்தாண்டு தினமான இன்று கங்கைகொண்டசோழபுரம் பிரகதீஸ்வரர் கோவிலில் சிறப்பு வழிபாடு நடைபெற்றது. கொரோனா வைரஸ் பரவல் எதிரொலி காரணமாக பக்தர்கள் வருகை குறைந்து காணப்பட்டது. மேலும் கோவிலுக்கு வரும் பக்தர்களை வெப்ப அளவு பரிசோதனை செய்து, மாஸ்க் அணிந்து வரும் பக்தர்கள் மட்டுமே தரிசனம் செய்ய அனுமதிக்கப்பட்டனர். மேலும் கங்கை கொண்டசோழபுரம் கோவிலில் இந்த ஆண்டு கொரோனா விதிமுறை காரணமாக பக்தர்கள் கூட்டம் இன்றி வெறிச்சோடி காணப்பட்டது என்பது குறிப்பிடத்தக்கது.