ஜெயங்கொண்டம் அருகே பூட்டியிருந்த வீட்டில் ஓட்டை பிரித்து, இரண்டு வீடுகளில் திருட்டு

அரியலூர் மாவட்டம் ஜெயங்கொண்டம் அருகே உள்ள செங்குந்தபுரம் 4 வது குறுக்கு தெருவை சேர்ந்தவர் சக்தி செல்வராஜ்.

கடந்த 4 நாட்களுக்கு முன்பு பாண்டிச்சேரியில் உள்ள தனது மகள் வீட்டிற்கு சென்று விட்டனர். இதேபோல் 6 வது குறுக்கு தெருவை சேர்ந்த பவுனம்மாள் தனசேகர் தம்பதியர்கள், வீட்டைபூட்டி விட்டு சென்னையில் உள்ள பவுனம்மாள் அக்கா மகன் திருமணத்திற்காக சென்றிருந்தனர்.

இந்நிலையில் வீட்டில் ஆட்கள் இல்லாததை தெரிந்து கொண்ட மர்ம நபர்கள், பூட்டி இருந்த 2 வீட்டின் ஓட்டை பிரித்து உள்ளே இறங்கி பீரோவை உடைத்து அதில் இருந்த பணம் மற்றும் நகைகளை கொள்ளையடித்துச் சென்றுள்ளனர்.

இதில் 6வது குறுக்குத் தெருவில் உள்ள பவுனம்மாள் வீட்டில் ரூபாய் 10 ஆயிரம் ரொக்கம் இரண்டு மோதிரம் சேர்ந்து 2 கிராம் நகை , ஏடிஎம் கார்டு, வீடு மற்றும் நிலத்து பத்திரம் உள்ளிட்டவைகளை மர்மநபர்கள் கொள்ளையடித்துச் சென்றுள்ளனர்.

4வது குறுக்குத் தெருவைச் சேர்ந்த சக்தி செல்வராஜ் என்பவர் வீட்டில் ரூபாய் 4 ஆயிரம் பணம் 2 கிராம் நகை உள்ளிட்டவைகளை கொள்ளையடித்துச் சென்றுள்ளனர்.

இதுகுறித்து ஜெயங்கொண்டம் போலீசார் வழக்கு பதிந்து, அரியலூர் கைரேகை நிபுணர்கள் மற்றும் மோப்ப நாய் வரவழைக்கப்பட்டு தீவிர விசாரணை செய்து வருகின்றனர்.